Digjet në Gjermani ndërtesa e zjarrfikësve që s’kishte alarm zjarri

Një stacion zjarrfikësish i teknologjisë së fundit në Gjermaninë perëndimore që përfundoi së ndërtuari vitin e kaluar me një kosto prej dhjetëra milionë eurosh, është djegur deri në themel për shkak se nuk ishte pajisur me alarm zjarri.

Qyteti i Stadtallendorf kishte zbuluar me krenari strukturën e re më pak se një vit më parë, por herët të mërkurën shërbimet e urgjencës u alarmuan për një zjarr që kishte filluar në një automjet, përpara se të përhapej shpejt në të gjithë ndërtesën, raporton The Guardian.

Rreth 170 zjarrfikës luftuan me flakët, duke përfshirë anëtarë të brigadës vullnetare të zjarrit, ndërsa flakët në lartësi prej 10 metrash dilnin nga çatia e stacionit.

Askush nuk u lëndua, por 10 vetura zjarrfikësish u shkatërruan. 

Ngjarja ka shkaktuar zemërim për shkak se ndërtesa nuk kishte alarm zjarri, dhe për më tepër kjo nuk ishte një kërkesë ligjore.

Norbert Fischer, presidenti i Shoqatës së Brigadës Shtetërore të Zjarrfikësve të Hessen, ka bërë thirrje për një rishikim urgjent të legjislacionit.

Shkaku i zjarrit ende nuk është përcaktuar, por raportet fillestare thonë se një karikues baterie mund të jetë mbinxehur.