Bombardimet izraelite në Gaza mund t’i vrasin pengjet, paralajmëron Hamasi

Hamasi ka paralajmëruar të mërkurën se pengjet mund të vriten nëse Izraeli përpiqet t'i marrë me forcë dhe po ashtu nëse sulmet ajrore vazhdojnë në Rripin e Gazës, raporton Agence France-Presse (AFP).

Grupi militant palestinez ka thënë në një deklaratë se "po bënte gjithçka që është e mundur për të mbajtur gjallë robërit e okupimit". 

“Bombardimet e rastësishme sioniste (izraelite) po rrezikojnë jetën e tyre. Sa herë që okupimi përpiqet t'i tërheqë robërit e tij me forcë, përfundon duke i kthyer ata në arkivole", thuhet në deklaratë. 

Ndërkohë qindra palestinezë kanë marrë pjesë të martën në protestën më të madhe kundër Hamasit në Gaza që nga fillimi i luftës me Izraelin, duke vërshuar rrugët dhe duke kërkuar që grupi të largohet.

Militantët e maskuar të Hamasit, disa të armatosur, kanë ndërhyrë dhe e kanë shpërndarë me forcë turmën.

Protestuesit kanë dalë rrugëve me brohoritjet “jashtë Hamasi”.

Mbështetësit e Hamasit ndërkohë e kanë mbrojtur grupin duke i akuzuar pjesëmarrësit në protestë si tradhtarë.