-
Përktheu:
Flutura Gashi-Mehmeti
- 20 gusht 2024 10:09
- Shpërndaje në:
Sekretari amerikan i Shtetit, Antony Blinken, po qëndron në Egjipt të martën, për të kërkuar përparim për një armëpushim të mundshëm dhe marrëveshje për lirimin e pengjeve.
Blinkeni mbërriti në Egjipt nga Tel Avivi, ku tha se kryeministri izraelit Benjamin Netanyahu kishte pranuar një "propozim urë" të SHBA-së që synonte ngushtimin e boshllëqeve midis dy palëve, pasi bisedimet javën e kaluar u ndërprenë pa ndonjë përparim. Ai i kërkoi Hamasit të pranojë gjithashtu propozimin si bazë për më shumë bisedime, raporton Reuters.
Grupi militant palestinez nuk e ka refuzuar përfundimisht propozimin, por ka thënë se ai tërhiqet nga zonat e dakorduara më parë dhe ka akuzuar Izraelin dhe aleatin e tij të SHBA-së se po e kthejnë procesin e negociatave me keqbesim.
Në Egjipt, Blinkeni është takuar me presidentin Abdel-Fattah El-Sisi, vendi i të cilit ka ndihmuar në ndërmjetësimin e bisedimeve të hapura për Gazën prej muajsh, së bashku me SHBA-në dhe Katarin.
Në rrezik është fati i Gazës së vogël e të mbushur me njerëz, ku fushata ushtarake e Izraelit ka vrarë më shumë se 40,000 njerëz që nga tetori, sipas autoriteteve palestineze shëndetësore, dhe të pengjeve të mbetura që mbahen atje.
Lufta në Gaza filloi më 7 tetor 2023, kur persona të armatosur të Hamasit sulmuan komunitetet izraelite, duke vrarë rreth 1200 njerëz dhe duke rrëmbyer rreth 250 pengje, sipas të dhënave izraelite.
Të martën, ushtria izraelite ka bërë të ditur se ka gjetur trupat e gjashtë pengjeve në Gazën jugore, duke shtuar se 109 pengje mbetën në territorin palestinez, prej të cilëve rreth një e treta besohet të jenë tashmë të vdekur.
Blinkeni niset për në Egjipt pas takimit me liderët izraelitë në Tel Aviv
Sekretari amerikan i Shtetit, Antony Blinken, është nisur për në Egjipt të martën, pas takimit me liderët në Izrael, në një përpjekje për të siguruar një marrëveshje armëpushimi në Gaza.
Para se të fluturonte nga Tel Avivi, Blinkeni ka thënë se Izraeli kishte pranuar një propozim të hënën për të kapërcyer mosmarrëveshjet duke mbajtur armëpushimin dhe lirimin e pengjeve në Gaza, raporton AP.
Ai i bëri thirrje Hamasit të bëjë të njëjtën gjë.
Vizita e fundit e Blinkenit në rajon është e nënta që nga fillimi i luftës në Gaza, më shumë se 10 muaj më parë.
Konflikti filloi më 7 tetor kur militantët palestinezë vranë rreth 1200 njerëz, kryesisht civilë, në të gjithë Izraelin jugor, dhe morën rreth 250 pengje përsëri në Gaza.
Ofensiva hakmarrëse e Izraelit në Gaza ka vrarë mbi 40,000 palestinezë, sipas zyrtarëve lokalë të shëndetësisë.
LEXO EDHE:
