BE-ja dhe Britania shtojnë sanksionet ndaj Iranit

Bashkimi Evropian ka shtuar sanksionet kundër Iranit për shkak të mbështetjes së Teheranit ndaj Rusisë në luftën me Ukrainën, ka thënë të hënën Komisioni Evropian.

Komisioni ka thënë se e ka shtuar Linjën e Dërgesave të Republikës Islamike të Iranit (IRISL) dhe drejtorin, Mohammad Reza Khiabani, me të tjerë, në listën e të sanksionuarve, raporton Reuters.

Sanksionet e reja janë kundër anijeve dhe porteve të përdorura për transportimin e mjeteve ajrore pa pilotë (UAV), raketave dhe teknologjive e komponentëve të lidhur me të. Në to përfshihet ndalimi i çdo transaksioni me portet në pronësi, të operuara ose të kontrolluara nga individët dhe subjektet e sanksionuara.

Drejtori menaxhues i Organizatës së Porteve dhe Detit të Iranit, Ali Akbar Safaei i ka dënuar sanksionet e reja dhe i ka mohuar “akuzat evropiane” si “të pabaza”, ka njoftuar të hënën agjencia zyrtare e lajmeve e Iranit, IRNA.

BE-ja ka sanksionuar gjithashtu tri firma ruse të transportit - MG Flot, VTS Broker dhe Arapax - për transportimin e armëve iraniane, përfshirë pjesë të dronëve, përmes Detit Kaspik për t’i rifurnizuar trupat ruse në Ukrainë.

Britania gjithashtu i ka shtuar sanksionet ndaj linjave ajrore dhe kompanive të dërgesave të hënën, masa të marra kundër veprimit të Iranit: transportimit të raketave balistike në Rusi, sipas Reuters.

Kompania shtetërore, Iran Air dhe Linjat e Dërgesave të Republikës Islamike të Iranit (IRISL) do të përballen me ngrirje të aseteve për rolin e tyre në furnizimin e Rusisë me armë për përdorim në fushëbetejën me Ukrainën, sipas Britanisë.

“Përpjekjet e Iranit për ta kërcënuar sigurinë globale janë të rrezikshme dhe të papranueshme”, ka thënë Sekretari i Jashtëm britanik, David Lammy. “Ne e përsërisim thirrjen tonë ndaj Iranit që ta ndërpresë mbështetjen e luftës së paligjshme të Rusisë në Ukrainë”.

Sanksionet do të kufizojnë më tej shërbimet ajrore të drejtpërdrejta komerciale të Iran Air-it drejt dhe nga Mbretëria e Bashkuar. Britania e ka sanksionuar gjithashtu anijen ruse të mallrave, PORT OLYA-3 për rolin e saj në transportimin e furnizimeve ushtarake në Rusi.