Një sondazh tregoi të martën se 85 për qind e grenlandezëve nuk duan që ishulli i tyre në Arktik – një territor gjysmë-autonom danez – të bëhet pjesë e Shteteve të Bashkuara, raportoi e përditshmja daneze Berlingske.
Presidenti amerikan Donald Trump ka thënë këtë muaj se Grenlanda ishte jetike për sigurinë e SHBA-së dhe se Danimarka duhet të hiqte dorë nga kontrolli mbi këtë ishull strategjikisht të rëndësishëm.
Sondazhi i kryer nga agjencia Verian, i porositur nga gazeta daneze, tregoi se vetëm 6 për qind e grenlandezëve janë pro bashkimit me SHBA-në, ndërsa 9 për qind janë të pavendosur.
Danimarka ka thënë të hënën se do të shpenzojë 2 miliardë dollarë për të forcuar praninë ushtarake në Arktik.
Grenlanda – me një sipërfaqe më të madhe se Meksika dhe një popullsi prej 57 mijë banorësh – fitoi autonomi vetëqeverisëse në vitin 2009, duke përfshirë të drejtën për të shpallur pavarësinë nga Danimarka përmes një referendumi.
Kryeministri i Grenlandës, Mute Egede, i cili ka intensifikuar përpjekjet për pavarësi, ka deklaruar në mënyrë të përsëritur se ishulli nuk është në shitje dhe se u takon banorëve të tij të vendosin për të ardhmen.
Ushtria amerikane ka prani të përhershme në Bazën Hapësinore Pituffik në veriperëndim të Grenlandës, vendndodhje strategjike për sistemin e saj të paralajmërimit të hershëm për raketat balistike, pasi rruga më e shkurtër nga Evropa në Amerikën e Veriut kalon përmes këtij ishulli.
