-
Nga:
Associated Press
-
Përktheu:
Flutura Gashi-Mehmeti
- 7 nëntor 2024 13:05
- Shpërndaje në:
Rreth 50 liderë evropianë, përfshirë presidentin ukrainas Volodymyr Zelensy dhe sekretarin e përgjithshëm të NATO-s, Mark Rutte, do të rivlerësojnë marrëdhëniet e tyre transatlantike, me shpresën se presidenca e dytë e Donald Trumpit në SHBA do të shmangë mosmarrëveshjet dhe rreziqet gjatë administratës së tij të parë.
Duke e komplikuar më tej një situatë tashmë të komplikuar, Gjermania, shteti i trazuar ekonomik i Evropës, u zhyt në krizë politike pasi kancelari gjerman, Olaf Scholz shkarkoi ministrin e tij të Financave.
Kjo krijon mundësinë e zgjedhjeve brenda pak muajsh dhe një tjetër ngecjeje mes të djathtës së guximshme dhe partive të pushtetit në Evropë.
"Këto dyja të kombinuara i shtojnë edhe më shumë piper dhe kripë kësaj situate”, ka thënë kryeministri polak, Donald Tusk.
Por pasojat e zgjedhjeve në SHBA mbetën ende në qendër të vëmendjes.
“Marrëdhënia jonë me SHBA-në është thelbësore dhe ne jemi të gatshëm ta thellojmë atë”, ka thënë presidenti i Këshillit Evropian, Charles Michel.
27 vendet nga blloku i Bashkimit Evropian do të takohen në një samit të veçantë sapo liderët e tjerë nga Mbretëria e Bashkuar, Turqia dhe Ballkani të largohen në mbrëmje, pas samitit të Komunitetit Politik të Evropës, që u zhvillua të enjten në Budapest të Hungarisë.
Gjatë fushatës së tij elektorale, Trumpi ka kërcënuar çdo gjë, nga një luftë tregtare me Evropën, deri te tërheqja e angazhimeve të NATO-s, dhe një zhvendosje thelbësore e mbështetjes për Ukrainën në luftën e saj me Rusinë, të gjitha çështjet që mund të kenë pasoja për kombet në të gjithë Evropën.
Kryeministri hungarez, Viktor Orban, i njohur si një fans i Trumpit, ka thënë herët të enjten se kishte zhvilluar një telefonatë me presidentin e ardhshëm gjatë natës.
“Ne kemi plane të mëdha për të ardhmen”, ka deklaruar Orban.
Kështu bëri edhe kryeministrja italiane e ekstremit të djathtë Giorgia Meloni, e cila lavdëroi "partneritetin strategjik të thellë dhe historik që ka lidhur gjithmonë Romën dhe Washingtonin".
Administrata e Trumpit vendosi tarifa për çelikun dhe aluminin e BE-së në vitin 2018, bazuar në pretendimin se produktet e huaja, edhe nëse prodhoheshin nga aleatët amerikanë, ishin një kërcënim për sigurinë kombëtare të SHBA-së.
Ndikimi i rezultatit të zgjedhjeve në SHBA mund të ndihet në Evropë për vitet në vijim, për çështjet përfshirë luftërat në Ukrainë dhe Lindjen e Mesme, si dhe migrimin dhe ndryshimet klimatike.
Ndër liderët që do të marrin pjesë të enjten është Zelensky, i cili pritet të bëjë një tjetër lutje për më shumë ndihmë ndërsa vendi i tij vazhdon luftën kundër Moskës.
Trumpi është zotuar t'i japë fund luftës "brenda 24 orëve" nga zgjedhja, diçka që udhëheqësit në Kiev e interpretojnë si një avullim të mbështetjes së SHBA-së me fitoren e tij.
