Bideni premton mbështetje “të hekurt” për Izraelin

Presidenti amerikan, Joe Biden i ka premtuar Izraelit mbështetje "të hekurt" të SHBA-së, mes frikës se Teherani mund të nisë hakmarrje pas një sulmi izraelit që la të vdekur zyrtarë të lartë iranianë.

Bideni paralajmëroi se Irani po kërcënon të nisë një "sulm kuptimplotë" pasi Izraeli goditi konsullatën iraniane në Siri, 10 ditë më parë.

“Ne do të bëjmë gjithçka që mundemi për të mbrojtur sigurinë e Izraelit”, ka deklaruar Biden, raporton BBC.

Më herët të mërkurën, udhëheqësi iranian, Ayatollah Ali Khamenei ka thënë se sulmi izraelit në Damask ishte i barabartë me një sulm ndaj vetë Iranit.

"Kur ata sulmuan zonën tonë të konsullatës, ishte sikur ata sulmuan territorin tonë”, ka thënë Ali Khamenei në një fjalim televiziv.

“Regjimi i keq duhet të dënohet, dhe do të dënohet”, ka shtuar ai.

Nuk është ende e qartë se çfarë forme do të ketë sulmi i tyre hakmarrës.

Që Irani të godasë drejtpërdrejt Izraelin do të rrezikonte një përshkallëzim edhe më të madh të konfliktit dhe analistët kanë thënë se Irani nuk ka aftësinë ushtarake për një konfrontim të rëndësishëm.

Një alternativë e mundshme është një sulm nëpërmjet një përfaqësuesi iranian si Hezbollah, i cili shpesh kryen sulme më të vogla ndaj Izraelit nga Libani fqinj.

Të dielën, një zyrtar iranian paralajmëroi se ambasadat e Izraelit "nuk ishin më të sigurta", duke shtuar se një ndërtesë konsullate mund të ishte një objektiv i mundshëm.

Ekspertët kanë thënë gjithashtu se Irani mund të synojë Izraelin me një sulm kibernetik.

Trembëdhjetë persona u vranë në sulmin e 1 prillit në ndërtesën e konsullatës iraniane, duke përfshirë udhëheqës të lartë ushtarakë iranianë.

Izraeli nuk e ka marrë përgjegjësinë për sulmin, por gjerësisht konsiderohet se qëndron pas tij.
Forcat amerikane dhe izraelite në rajon janë vënë në gatishmëri të lartë këto ditë.