Wagneri pretendon se ka marrë kontrollin e Rostovit dhe objekteve ushtarake në Voronezh

Disa foto të mediave ndërkombëtare kanë paraqitur luftëtarët e Wagnerit brenda qytetit jugor rus të Rostov-në-Don, të cilin shefi i grupit të mercenarëve, Yevgeny Prigozhin, ka thënë se forcat e tij tani e kontrollojnë, shkruan BBC. Krerët e Wagnerit thonë se tash e kanë kontrollin edhe në objektet ushtarake në Voronezh.

Pamjet në kanalet lokale Telegram duket se tregojnë forcat e armatosura të Wagnerit që rrethojnë një ndërtesë qeveritare.

Pamjet tregojnë burra të armatosur me uniformë duke ecur rreth perimetrit të ndërtesës, ndërsa automjetet e blinduara e rrethojnë atë, duke përfshirë dy tanke.

Sipas Reuters, vendndodhja ishte ndërtesa e selisë së policisë.

Ndërkohë guvernatori lokal Vasily Golubev u bëri thirrje banorëve të shmangin qendrën e Rostov-në-Don.

“Në lidhje me situatën aktuale, ju kërkoj që të përmbaheni nga udhëtimi në qendër të qytetit dhe nëse është e mundur të mos dilni nga shtëpitë tuaja”, ka shkruar ai në Telegram.