Departamenti i Sigurisë Kombëtare pritet të lejojë ukrainasit që ndodhen në Shtetet e Bashkuara të qëndrojnë në vend, nën një formë ndihme humanitare, sipas tre burimeve të njohura me vendimin.
Lehtësimi – i njohur si Statusi i Mbrojtur i Përkohshëm, ose TPS, vlen për njerëzit që do të përballeshin me vështirësi ekstreme nëse do të detyroheshin të ktheheshin në atdheun e shkatërruar nga konflikti i armatosur ose fatkeqësitë natyrore. Si të tilla, këto mbrojtje janë të kufizuara për njerëzit tashmë në Shtetet e Bashkuara. Sekretari i DHS ka diskrecionin për të caktuar një vend për TPS.
Rreth 30,000 ukrainas me viza mund të përfitojnë nga ky status i mbrojtur, sipas Institutit të Politikave të Migracionit, një institut kërkimor jopartiak. Zgjerimi i TPS-së për ukrainasit të cilëve u janë lëshuar viza të përkohshme do t'i mbronte ata nga dëbimi kur të skadojnë ato viza.
Një zëdhënës i Sigurisë Kombëtare ka thënë në një deklaratë se departamenti vazhdon të "monitorojë nga afër kushtet në vende të ndryshme anembanë globit", duke shtuar, "ne nuk kemi njoftime për të ndarë apo parë për momentin".
Administrata e presidentit Biden ka qenë nën presionin e ligjvënësve demokratë dhe republikanë, së bashku me avokatët e emigrantëve, për të siguruar mbrojtje për ukrainasit në SHBA, të cilët nuk mund të kthehen në Ukrainën e shkatërruar nga lufta.
Në një letër drejtuar Presidentit Biden këtë javë, një grup dypartiak senatorësh i kërkoi administratës të zgjasë lehtësimin, duke shkruar.
“Të detyrosh shtetasit ukrainas të kthehen në Ukrainë në mes të një lufte do të ishte në kundërshtim me vlerat e Amerikës dhe interesat tona të sigurisë kombëtare”.
Ukraina do t'i bashkohej një liste prej 12 vendeve, përfshirë Sudanin e Jugut dhe Venezuelën, që janë caktuar gjithashtu për TPS.
