Vëllaznimi ka shënuar fitore të vështirë ndaj Borës së Prishtinës. Të dielën mbrëma në atmosferë të bukur në palestrën “Shani Nushi” në Gjakovë, Vëllaznimi fitoi me rezultat 87:78.
Ekipi gjakovar fitoren e arriti vetëm pas vazhdimit prej pesë minutave.
Pas 40 minutave lojë rezultati ishte 76:76. Madje pikët e barazimit Vëllaznimi i shënoi në sekondat e fundit përmes Jericole Hellems.
Në pesë minutat shtesë, vendasit i shënuan 11 pikë, ndërsa lojtarët e Borës vetëm dy.
Hellems shkëlqeu te Vëllaznimi me 42 pikë. Don Polloshka i kishte 17 pikë, nëntë asistime e pesë kërcime. Ndërkohë Jason Jitoboh e përfundoi ndeshjen me 16 pikë e shtatë kërcime.
Te Bora më i miri ishte Musab Mala me 21 pikë, gjashtë kërcime e tri asistime. Derrick Woods i kishte 10 pikë e tetë kërcime. Adem Mekiq realizoi 11 pikë e 11 kërcime, por i kishte edhe nëntë topa të humbur.
Vëllaznimi tani i ka 13 fitore e 13 humbje.
Bora mbetet me tetë fitore, ndërsa i ka pësuar 18 humbje. Do të përfundojë në vendin e shtatë dhe do të luajë në plejaut.
