Kryeqytetasit mposhtën Besëlidhjen dhe kanë avancuar në gjysmëfinale të garës që po organizohet në Vlorë.
“Bardhekaltrit” të enjten mbrëma fituan me rezultatin 80:79.
Skuadra e elitës së basketbollit të Shqipërisë ishte duke avancuar deri afro dy minuta pa u mbyllur ndeshja që pati fund dramatik.
Çerekun e parë, Besëlidhja e fitoi 28:9, kurse të dytin e fituan prishtinasit, 22:17.
Në fund të periudhës së tretë, Sigal Prishtina u afrua në tri pikë, 62:59.
Ndërkohë, periudha e fundit ishte vendimtare.
Barazimi i parë i rezultatit, 77:77, erdhi 1 minutë e 40 sekonda para fundit me dy pikët e Diamond Stone nga gjuajtja e lirë.
Philbert Walton Weekes më pas e shënoi një gjuajtje të lirë për 78:77 në të mirë të Besëlidhjes.
Më pas pati humbje të aksioneve nga të dyja skuadrat, kurse pikët e fitores së Prishtinës i shënoi Donte Clark. Ai realizoi për tri pikë pesë sekonda para fundit të gjithë takimit për 80:78 në të mirë të “bardhekaltërve”.
Në aksionin vijues të Besëlidhjes u shkaktua faull, ndërsa nga dy gjuajtjet e lira, Eldi Hysa e realizoi vetëm njërën për rezultatin përfundimtar 80:79, në të mirë të Sigal Prishtinës.
Julian Hamati bëri kërcim në sulm por dështoi të shënonte dhe ndeshja u mbyll me fitoren e “bardhekaltërve”.
Clark i Prishtinës ishte më i miri në statistika me 20 pikë, gjashtë kërcime e katër asistime, kurse Stone pati 26 pikë, gjashtë kërcime e dy asistime.
Hamiti ishte më i dalluari te Besëlidhja me 24 pikë, 16 kërcime e dy asistime.
Sigal Prishtina në gjysmëfinale do të luajë kundër Trepçës që të mërkurën e eliminoi Kamzën lehtësisht.
Ndërkohë, Peja do të ballafaqohet me Yllin në gjysmëfinalen tjetër.
Ndeshjet gjysmëfinale luhen të premten në orarin prej orës 16:00 dhe 19:00.
Të dielën luhet finalja dhe ndeshja për vendin e tretë.
