Në Ligën Unike – Grupi A të mërkurën mbrëma nuk kanë gabuar as dy skuadrat tjera të Superligës së Kosovës, Vëllaznimi e Bashkimi.
Vëllaznimi në “Shani Nushi” e mposhti Besëlidhjen 85:75, ndërsa Bashkimi në palestrën “Sezai Surroi” në Prizren fitoi 96:88 përballë Teutës. Bashkimi, pavarësisht fitores, nuk ka arritur që të avancojë tutje.
Ndeshjet i kanë takuar xhiros së gjashtë të Ligës Unike.
21 pikë, tetë kërcime e tri asistime i pati Trey Anderson i Vëllaznimit dhe i kishte statistikat më të mira në fitore, ndërsa Besëlidhjes nuk i ndihmuan 12 pikët, 19 kërcimet e dy asistimet e Philbert Weekesit.
Mack Smith i kishte statistikat më të mira te Bashkimi në fitore. Ai për pak sa nuk realizoi “triple-double”. I kishte 12 pikë, tetë kërcime e dhjetë asistime.
Te Teuta lojë të mirë pati Bryan Powell me 22 pikë, pesë kërcime e po aq asistime.
Vëllaznimi i pari ka 11 pikë me 5 fitore e një humbje, ndërsa Besëlidhja e dyta ka dhjetë pikë me 4 fitore e dy disfata.
Bashkimi i treti ka gjashtë pikë, ndërsa Teuta e fundit ka pesë pikë.
Bashkimi e ka edhe një ndeshje për ta zhvilluar ndaj Teutës, atë të xhiros së tretë.
Por, janë Vëllaznimi dhe Besëlidhja që kanë siguruar “Final 4” të Ligës Unike.
