Sanksionet evropiane ndaj Rusisë mund të shkaktojnë probleme serioze për industrinë lokale të veturave, por Lada shpreson për një rimëkëmbje falë lansimit të modeleve të reja të planifikuara për të ardhmen dhe një objektivi të ri që përfshin ndërtimin e 500 mijë automjeteve në vit, shkruan Autocar.
AvtoVAZ, pronari i markës Lada, tani është çliruar nga ndikimi i Grupit Renault pasi kompania franceze i shiti shtetit asetet e saj ruse – të paktën tani për tani.
Menjëherë pas pushtimit rus të Ukrainës, problemet e furnizimit të shkaktuara nga sanksionet e detyruan Ladën të prodhonte dhe të shiste automjete pa ABS, airbag dhe ajër të kondicionuar. Megjithatë, prodhuesi rus i veturave nuk hoqi dorë dhe ka një plan të ri për të ristrukturuar biznesin e tij.
Maxim Sokolov, ish-ministri rus i Transportit dhe presidenti aktual i AvtoVAZ, zbuloi se propozimet për modelet e reja Lada do t'i paraqiten bordit këtë muaj.
Nën pronësinë e mëparshme, Lada do të prezantonte modele të reja të bazuara në platformën mekanike CMF, e cila do të ndahej me markën Dacia.
Megjithatë, pa qasje në komponentët nga grupi Renault-Mitsubishi-Nissan, Lada mund të mbështetet në përdorimin e platformave dhe motorëve më të vjetër për modelet e saj të reja.
Ky nuk është problem për tregun rus, pasi rregulloret evropiane të emetimeve dhe sigurisë nuk zbatohen atje. Është interesante se Lada po punon gjithashtu për veturën e saj të parë elektrike, e lënë të kuptohet nga koncepti e-Largus, bazuar në bazën e elektrizuar B0 të Renault Group.
Objektivi i ri i prodhimit është 500 mijë njësi në vit, shumica e të cilave do të bëhen në fabrikën Togliatti, e cila aktualisht ka 42 mijë punëtorë.
Ky është një synim më modest se sa ai i vendosur më parë nga Renault, duke investuar miliarda në atë fabrikë.
Tregu i veturave në Rusi është goditur rëndë këtë vit. Shitjet e veturave të reja në korrik pësuan rënie 75 për qind nga viti 2021 të njëjtë periudhë. Situata ishte më e mirë në gusht, megjithëse numri i përgjithshëm mbeti 62 për qind më i ulët se vitin e kaluar.
