Zyra e Prokurorit të Specializuar ka kohë deri më 17 dhjetor që të dorëzojë dosjen paraprake në rastin kundër ish-eprorëve të UÇK-së, Hashim Thaçi, Rexhep Selimi, Kadri Veseli e Jakup Krasniqi.
Në të vërtetë gjykatësi i procedurës paraprake Nicolas Guillou gjatë konferencës për ecurinë e çështjes Thaçi dhe të tjerët, më 29 tetor, ka lëshuar vendim gojor ku ka urdhëruar ZPS-në që deri më 17 dhjetor ta dorëzojë dosjen paraprake.
“Gjatë konferencës për ecurinë e çështjes në çështjen Thaçi dhe të tjerët, më 29 tetor, gjykatësi i procedurës paraprake në këtë çështje, Nicolas Guillou, me vendim gojor urdhëroi Zyrën e Prokurorit të Specializuar që deri më 17 dhjetor 2021 të dorëzojë dosjen e saj paraprake”, thuhet nga Dhomat e Specializuara.
