“Urime komandant” - kryeterroristi Radoiçiq feston lirshëm ditëlindjen në Serbi

I kërkuari nga Kosova për sulmin terrorist në Banjskë, Milan Radoiçiq, ka festuar si “komandant” i lirë ditëlindjen e tij të 46-të në Kopaonik të Serbisë, bazuar në pamjet që janë publikuar në rrjete sociale të enjten. Videon e ka publikuar edhe politikani serb Nemanja Saroviq.

“Milan Radoiçiqi ishte në Kopaonik dje. Me fishekzjarrë dhe banerin ‘Urime ditëlindjen komandant’ festoi ditëlindjen e 46-të. Çfarë i ka dhuruar Aleksandar Vuçiqi?” ka pyetur udhëheqësi i lëvizjes politike “Dashuri, Besim, Shpresë” në Twitter.

Në video shihet Radoiçiqi nga prapa teksa u afrohet disa burrave që mbajnë banerin. Në video shihen edhe fishekzjarrët.

Radoiçiqi ka marrë përgjegjësinë për sulmin terrorist të 24 shtatorit në Banjskë të Zveçanit, ku mbeti i vrarë polici Afrim Bunjaku. Në aksionin pasues të Policisë së Kosovës, u vranë tre sulmues. Shumica e sulmuesve ikën. Pamjet kanë treguar qartë udhëheqjen e grupit nga Radoiçiqi. Ai ka pranuar përgjegjësinë, ndërsa në Serbi është liruar.

Ditë më parë, ministri i Punëve të Brendshme i Kosovës, Xhelal Sveçla, njoftoi se të gjithë të dyshuarit për sulmin terrorist në Banjskë të Zveçanit janë vendosur në sistemin e urdhërarrestit ndërkombëtar të Interpolit.