Në një bashkëbisedim të thellë në podcastin PIKË me historianin austriak Florian Bieber, publicisti Veton Surroi ka diskutuar për perspektivat e ardhshme të marrëdhënieve ndërmjet Kosovës dhe Serbisë, duke theksuar se normalizimi i këtyre marrëdhënieve është një proces që kërkon angazhim të vazhdueshëm, jo vetëm nga ky brez, por edhe nga brezat e ardhshëm.
Surroi theksoi se faza përfundimtare duhet të jetë një periudhë paqeje dhe bashkëjetese mes dy vendeve, ku shoqëritë të ndihmojnë njëra-tjetrën në krijimin e një kulture paqeje. Ai shtoi se, megjithëse njohja e Kosovës nga Serbia mund të ndodhë menjëherë, urrejtja mes popujve mund të vazhdojë për shumë vite, dhe ky do të jetë një sfidë e madhe.
“Ka disa faza. Faza përfundimtare në të cilën duhet të aspirojmë është një fazë në të cilën Kosova dhe Serbia jetojnë në paqe. Edhe në një kulturë paqeje. Nëse ne i normalizojmë marrëdhëniet sot, Serbia e njeh Kosovën sot, do të ketë ende urrejtje në shoqëritë tona për shumë vite përpara dhe kështu ne duhet ta mendojmë atë si një fazë, faza përfundimtare e normalizimit tonë duhet të jenë vendet dhe popujt tanë që jetojnë në paqe. Si pjesë e një rajoni shumë paqësor si pjesë e një Evrope paqësore”, ka thënë ai.
Në përgjigje të pyetjes për pritshmëritë e tij lidhur me Serbinë dhe ndikimin e nacionalizmit serb, Surroi theksoi se për të arritur një normalizim të vërtetë, duhet të bëhet një normalizim i brendshëm i të dyja shteteve.
“Nuk mund të ketë normalizim të marrëdhënieve ndërmjet Serbisë dhe Kosovës, nëse nuk ka normalizim të Serbisë në fillim, dhe normalizim të Kosovës, natyrisht përbrenda. Jemi në fazën në të cilën mund t'i shohim gjërat duke lëvizur, duke evoluar pozitivisht në Serbi sepse sapo të filloni të kujdeseni për Serbinë dhe të mos kujdeseni për mënyrën se si po udhëhiqet Podgorica ose Banjalluka apo niveli i përfshirjes apo drejtimi që kanë serbët e Kosovës apo asociacioni i komunave, gjëra të tilla, atëherë ju në fakt po përpiqeni të rregulloni shtëpinë tuaj. Dhe një shtëpi që është në rregull atëherë mund të komunikojë me shtëpi të tjera”, u shpreh Surroi.
Bieber, duke e përmbyllur bisedën, e cilësoi këtë perspektivë si një vizion optimist për të ardhmen, me Surroin që shprehu shpresën për një mundësi të vërtetë paqeje.
