Punëtorët teknikë të Kuvendit të Kosovës kanë kërkuar që paga nga 270 euro t’iu rritet deri në 500 euro, në të kundërtën, thanë se do të vazhdojnë me veprime të tjera sindikale.
Kryetari i Sindikatës së Punëtorëve të Sektorit Privat, Jusuf Azemi, ka thënë se problemi është te kompania kontraktuese ku prej 18.000 eurove, vetëm 6.000 ndahen për këta punëtorë.
“Shuma është 18 mijë euro, ndërsa që e marrin punëtorët është 6 mijë euro. Më shumë merr buxhet pronari i kompanisë. Jemi dalë të protestojmë për paga të ulëta për punëtorët teknikë që kryejnë shërbime për Kuvendin e Kosovës. Që të jemi parimor ne kemi bë bisedë me sekretarin e Kuvendit dhe drejtorin e Administratës të cilët me përpikëri na kanë shpjeguar për procedurën e çështjes së pagave të punëtorëve. Kuvendi i Kosovës kompanisë ia përcjell 18 mijë euro brenda muajit për shërbimet që i kryejmë dhe ne e kemi komunikuar shumë mirë me sekretarin. Problemi është tek kompania e cila kryejnë shërbime”, ka thënë Azemi për EO, teksa ka paralajmëruar edhe veprime tjera.
Sipas tij, nëse nuk ka reflektim nga pronari i kompanisë, prej javës së ardhshme punëtorët nuk do t’i kryejnë shërbimet.
Përfaqësuesja e punëtorëve, Nazife Krasniqi, ka thënë se kërkesa e vetme e tyre është të marrin atë se çka iu takon sipas ligjit.
“Ne kemi kërkuar me na u rrit pagat, kemi biseduar me sekretarin, drejtorin, aty është thënë se ka mundësi me u rrit pagat por neve operatori ekonomik nuk na është përgjigjur. Nuk mund të punojmë me 275 euro kur kemi me udhëtu e kemi ushqim por nuk po na mjafton”, është shprehur Krasniqi.
