Drejtori i Zyrës për Kosovë në Qeverinë e Serbisë, Petar Petkoviq, ka thënë se në takimin e të martës në Bruksel delegacioni serb ka insistuar në themelimin e Asociacionit të komunave me shumicë serbe.
“Gjëja e parë që delegacioni serb insistoi ishte AKS-ja, si gjëja më e rëndësishme, çështja kyçe, që mbi të gjitha lidhet me fatin dhe të ardhmen e popullit serb në Kosovë e M. Një çështje tjetër e rëndësishme që insistuam ishte ajo e dinarit, duke e pasur parasysh vendimi ne njëanshëm të Prishtinës për heqjen e dinarit, si dhe me këtë edhe pagesat për përfitime sociale e për shkollim për qytetarët serbë që i marrin ato mjete nga Serbia”, ka thënë Petkoviq për gazetarët pas takimit në Bruksel, raporton “RTS”.
Petkoviq ka thënë se për Serbinë formimi i asociacionit është kyç .
“Për ne, formimi i Asociacionit është vendimtar, sepse zgjidh plotësisht çështjen e financimit të të gjitha institucioneve tona dhe popullit serb, siç parashihej me Marrëveshjen e Brukselit dhe marrëveshjet tjera”, tha ai.
Ai ka treguar se kryenegociatori i Kosovës, Besnik Bislimi, ka insistuar në zyrtarizimin e Marrëveshjes së Ohrit, ndërsa delegacioni serb ka folur për domosdoshmërinë e formimit të AKS-së.
“Bëhet fjalë për një marrëveshje që është nënshkruar 11 vjet më parë, e cila është nënshkruar nga BE-ja si garantuese e saj”, ka thënë Petkoviq.
Petkoviq tha se problemet duhet zgjidhur “me dialog e jo me zgjidhje të imponuara”.
“Thelbi është se ne duhet t’i përmbahemi marrëveshjes dhe të përpiqemi për paqen dhe stabilitetin dhe të kërkojmë zgjidhje kompromisi për mbijetesën e popullit tonë. Nëse vazhdon kështu atëherë serbë s’do të ketë në Kosovë”.
Petkoviq ka paralajmëruar takime tjera javën e ardhshme.
“Pres që në fillim të javës së ardhshme, të hënën apo të martën, të vazhdojnë bisedimet e të jemi më afër marrëveshjes dhe të shkojmë në drejtim të zgjidhjes lidhur me çështjen e dinarit. Ne po luftojmë për mbijetesën e popullit serb në Kosovë e M. “, tha Petkoviq.
