Pengesat në rrugët e Prizrenit lënë pa aktivitete personat me distrofi muskulore

E, në Prizren nuk janë shënuar aktivitete për Ditën Ndërkombëtare të Përdoruesve të Karrocës. Aktivistë të Organizatës për Persona me Distrofi Muskulare thanë se nuk e shënuan këtë ditë, shkaku i pengesave aktuale për lëvizjen e lirë në trotuaret e këtij qyteti.

Për herë të parë, aktivistët e Organizatës për Persona me Distrofi Muskulore nuk e kanë shënuar me ndonjë aktivitet 1 marsin, Ditën Ndërkombëtare të Përdoruesve të Karrocës. Sipas tyre, aktivitete nuk janë realizuar shkaku i pengesave në lëvizjen e lirë për përdoruesit e karrocës, e që janë krijuar edhe si rezultat i punimeve të fundit në trotuaret e rrugës unazore.

“Ne për herë të parë nuk e shënojmë së paku me një aktivitet modest, sepse nuk duam ta marrim përgjegjësinë për personat me aftësi të kufizuara që përdorin karrocë, pasi qasshmëria në Prizren u bë shumë e vështirë”, ka thënë Resmije Rrahmani, përdoruese e karrocës.

“Aktivitet nuk ka sepse qasja e duhur nuk ekziston në Prizren, çdo ditë më shumë e më shumë pengesa po bëhen. Edhe ato që i kemi eliminuar në një kohë, tash prapë janë lind të reja”, ka thënë Antigona Shestan nga OPDMK.

Ditë më parë aktivistë të shoqërisë civile reaguan për mungesën e nivelizimit të duhur të trotuareve në ndërtim, edhe për qasjen e personave me aftësi të kufizuara. Ky shqetësim është adresuar edhe në seancën e fundit të Kuvendit të Prizrenit nga këshilltarja Dafina Alishani.

“Ju lus ta keni parasysh këtë pasi që po bëhet një punim në terren, mos të bëhen punët shkel e shko, por ta kemi seriozisht këtë sensitivitet ndaj këtij komuniteti dhe ta bëjmë të duhurën sepse e kemi obligim fundja”, ka thënë Dafina Alishani, asamblistë e VV-së.

Çelë Lamaj, drejtor i Shërbimeve Publike, ka thënë se punimet në trotuare janë në zhvillim e sipër dhe se ende nuk është bërë pranimi teknik i projektit.

“Dijeni që në momentin që të bëhet pranimi teknik, ju premtoj që para se të bëhet pranimi teknik, kanë për t’u marrë edhe shoqata që përkujdeset për PAK-të edhe ekspertët e tjerë dhe do të verifikohet çdo detal”, ka thënë Çelë Lamaj, drejtor i DSHP-së.

Qeveria komunale e Prizrenit, në urimin për Ditën Botërore të Përdoruesve të Karrocës, ka theksuar se bazohet në parimin e gjithëpërfshirjes dhe se do të angazhohet për krijimin e kushteve të barabarta.