Paniku nga koronavirusi: Qytetarët në Prishtinë blejnë ushqime rezervë

Situata e krijuar me koronavirusin ka shtyrë qytetarët e vendit që të sigurojnë rezerva ushqimore për kohë më të gjata.

Mielli, vaji dhe sheqeri kanë qenë disa prej produkteve më të kërkuara në dy ditët e fundit nëpër marketet e vendit, raporton KOHA.

Në njërën prej marketeve në Fushë-Kosovë raftet ku gjendet mielli këtë të mërkurë kanë qenë pothuajse të zbrazëta.

Në Agjencinë e Ushqimit dhe Veterinës thonë se ata janë duke përcjellë hulumtimet e OBSh-së dhe të organizatave për siguri ushqimore.

Sipas zyrtarëve të AUV-it, deri më tani nuk është vërtetuar se ky virus mund të bartet përmes produkteve ushqimore.

Në kuadër të masave parandaluese të përhapjes së kësaj sëmundjeje, Komuna e Prishtinës këtë të mërkurë ka mbyllur 4 qendrat për të moshuarit.

Pos kësaj, Komuna e Prishtinës është bërë institucioni i vetëm që ka marrë masa për koronavirusin.

Këtu përfshihen pezullimi i të gjitha tubimeve publike, ku pjesëmarrja mund të jetë më shumë se 50 persona, dezinfektimi i hapësirave publike dhe furnizimi me materiale shtesë higjienike në shkolla.