Pacientët me kancer kërkojnë që disa shërbime të ofrohen edhe në spitale të përgjithshme

Shoqata e grave nga Peja që përballen me kancer, “Duka Vita”, u ka kërkuar institucioneve që disa shërbime onkologjike të decentralizohen dhe që ato t’i ofrojnë edhe spitalet e përgjithshme. Në mungesë të shërbimeve, pacientëve u duhet të udhëtojnë rreth 200 kilometra në ditë për ta siguruar terapinë.

Naxhije Juka-Skenderi, e diagnostikuar me kancer në gji prej më shumë se një dekade, detyrohet të udhëtojë nga Peja për në Prishtinë, për të marrë terapinë tabletare në Klinikën e Onkologjisë.

Ajo tregon për vështirësitë me të cilat përballet dhe shpreh kërkesën që terapia hormonale të shpërndahet edhe në spitalet e përgjithshme.

“Hormono-terapi vazhdimisht kam marrë. Domethënë, për një kuti të tabletave, pacienti i Onkologjisë me dekadë duhet të shkojë në Onkologji në Prishtinë. Çka është absurde, çka i kushton ministrisë ato tableta t’i bartë në Pejë, nëpër mjekësi familjare apo në spital, kudo?”, ka thënë Juka-Skenderi. “Çka është më e dhimbshme, shumica e pacientëve onkologjikë nuk kanë fuqi të nisen vetë, se janë sende të paparashikueshme, secili nga 200 kilometra brenda ditës. Të shkosh ti të maltretohesh, e të presësh atje”.

Juka-Skenderi është edhe kryetare e shoqatës “Duka Vita”, në të cilën gratë nga rrafshi i Dukagjinit zhvillojnë aktivizmin kundër kancerit të gjirit. Ajo thekson se kërkesën për decentralizim të disa shërbimeve onkologjike e parashtroi me dhjetëra herë para përfaqësuesve të Shërbimit Spitalor Klinik Universitar e edhe Ministrisë së Shëndetësisë.

“Te të gjithë që kanë qenë, besomë prej 2013-s... të gjithë përveç premtimeve asgjë konkrete deri më tani... Drejtori ekzekutiv i spitalit, Fazli Shala, më shumë se dy vjet e ka siguruar repartin dhe është i mbyllur me gati 30 shtretër. Do të thotë i përgatitur. Këto të tjerat i mbesin Ministrisë së Shëndetësisë, Qeverisë. Për të gjitha këto kërkesa tona janë të njoftuar të gjithë”, ka thënë ajo.

Në Spitalin e Pejës theksuan se shërbimet mund të ofrohen, nëse për këtë vendoset në nivelin qendror, përkatësisht në SHSKUK dhe në Ministri të Shëndetësisë.

“Spitali i Përgjithshëm në Pejë shpreh gatishmëri për të ofruar shërbime për pacientë për nevojat që ata kanë dhe rrjedhimisht edhe për pacientë që kërkojnë shërbime onkologjike. Shërbimet e Onkologjisë janë shërbime të nivelit terciar dhe përgjegjësinë për hapjen e shërbimeve apo reparteve të këtij lloji, në rastin konkret Onkologjisë nuk është kompetencë e spitaleve si ofrues të shërbimeve dytësore shëndetësore, por është në kompetencën e SHSKUK-së dhe Ministrisë së Shëndetësisë që përcaktojnë shërbimet, repartet e njësitë për të gjitha institucionet shëndetësore në vendin tonë”, thuhet në një përgjigje të shkruar të Spitalit të Pejës.

KOHA ka adresuar pyetje edhe në Ministrinë e Shëndetësisë e edhe në SHSKUK, por nuk ka marrë përgjigje në lidhje me kërkesat e shoqatës së pacientëve me kancer.

Shembuj të decentralizimit të disa shërbimeve të këtilla, ka në Kosovë. Prej dy vjetësh mbi 100 pacientë nga rajoni i Prizrenit marrin terapinë tabletare 1 herë në muaj në spitalin e këtij qyteti, ndërsa një onkolog i QKUK-së viziton pacientët në këtë spital.