Kryeministri Albin Kurti dhe kryeparlamentari Glauk Konjufca kanë pritur në takim përfaqësuesit e opozitës shqiptare në Maqedoninë e Veriut të martën, nga ku është paralajmëruar për zyrtarizim të koalicionit.
Përfaqësuesi opozitar Izet Mexhiti ka deklaruar për RTK-në se ky është takim vëllazëror, derisa sa i përket mundësisë së një koalicioni ka deklaruar se Lëvizja Vetëvendosje nuk është e regjistruar në Maqedoninë e Veriut, por se pjesëtarët e LVV-së pritet t'i bashkohen partive opozitare.
Ai tutje shtoi se zyrtarizimi i këtij koalicioni pritet të ndodhë sot ose ditët në vijim.
Përveç Mexhitit, në takim ishin të pranishëm edhe kryetari i Aleancës për Shqiptarët, Arben Taravari, Afrim Gashi dhe Bilall Kasami.
Në Maqedoninë e Veriut të dielën u betua për herë të parë një kryeministër shqiptar. Talat Xhaferi i BDI-së do ta udhëheqë Maqedoninë e Veriut deri në maj kur pritet të mbahen zgjedhjet.
Kurti pati marrë pjesë në mitingje të opozitës shqiptare në Maqedoni të Veriut në zgjedhjet lokale. Megjithatë, për këto veprime, shefi i Qeverisë pati marrë kritika nga njohësit e politikës.
Kurti e uroi Xhaferin për postin e kryeministrit. Kurti dhe kryetari u BDI-ës, Ali Ahmeti, shpeshherë kanë pasur përplasje në distancë.
