Prokuroria Themelore në Prizren ka ngritur aktakuzë ndaj ministrit të Zhvillimit Rajonal, Fikrim Damka, dhe një personi tjetër nën dyshimin për veprat penale “sulm” dhe “kanosje”.
Sipas aktakuzës, i pandehuri Damka më 9 shkurt në Prizren kishte përdorur forcë fizike ndaj A.M. dhe M.J. pas një mosmarrëveshjeje të mëhershme, lidhur me publikimin e disa informatave dhe lajmeve në rrjetet sociale, për partinë KDTP dhe për të pandehurin Damka. Rasti kishte ndodhur derisa të dëmtuarit po qëndronin në parkun e lagjes me disa anëtarë të tjerë të partisë së tyre, YTHP. Sipas aktakuzës, Damka ka shtyrë viktimën dhe e ka kanosur e sulmuar.
Po ashtu, Damka akuzohet se i ka kanosur me fjalë të dëmtuarit A.M. dhe M.J. se do t’i privojë nga jeta.
E i pandehuri tjetër F.D. (1992), akuzohet se e ka kanosur me fjalë të dëmtuarin M.J., “se do t’i shkaktojë ndonjë të keqe, me qëllim të frikësimit dhe shkaktimit të ankthit, në atë mënyrë që, pasi e sulmon të dëmtuarin, i drejtohet me fjalë kanosëse, me ç’rast tek i dëmtuari shkakton frikë, ankth dhe pasiguri për jetën e tij. Me këto veprime, i njëjti ka kryer veprën penale “Kanosja” sipas KPRK-së”.
Prokurori i çështjes me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur për veprat penale për të cilat akuzohen të shpallen fajtor dhe të dënohen sipas ligjit.
Damka qe arrestuar ditën e zgjedhjeve nën dyshimin për sulm dhe kanosje të një kandidateje për deputete, derisa ndaj tij ishte caktuar masa e arrestit shtëpiak prej 30 ditësh. Por, arresti shtëpiak i qe ndërprerë më 7 mars, derisa masa i është zëvendësuar me ndalimin për t`iu afruar vendit apo personit të caktuar deri më 7 prill.
Damka e quan të pabazë aktakuzën: Do të vërtetohet pafajësia
Ministri i Zhvillimit Rajonal, Fikrim Damka, e ka quajtur të pabazë aktakuzën e ngritur sot nga Prokuroria Themelore në Prizren, ndaj tij dhe një personi tjetër, të afërm të tij, për sulm dhe kanosje.
Ai ka thënë se pafajësia e tij do të vërtetohet në gjykatë.
“Aktakuza është e pabazë dhe besoj se në gjykatë do të sqarohet gjatë seancave, dhe do të vërtetohet pafajësia”, tha Damka për RTKlive.
Gjatë ditës, Prokuroria në Prizren njoftoi për ngritjen e aktakuzës ndaj ministrit Damka dhe një tjetër personi me inicialet F.D i vitit të lindjes 1992, për shkak të dyshimit të bazuar mirë se secili veç e veç kanë kryer veprat penale “Sulmi” dhe “Kanosja”, më 9 shkurt, ditë kjo që në Kosovë mbaheshin zgjedhjet e përgjithshme parlamentare.
Prokurori i çështjes me rastin e ngritjes së aktakuzës, i ka propozuar gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur për veprat penale për të cilat akuzohen, të shpallen fajtor dhe të dënohen sipas ligjit.
Ata ishin arrestuar mbrëmjen e së dielës së 9 shkurtit, ndërsa më 11 shkurt ndaj Damkës dhe familjarit të tij ishte caktuar masa e arrestit shtëpiak, pasi Gjykata Themelore në Prizren kishte refuzuar kërkesën e prokurorisë për caktimin e paraburgimit për dy të pandehurit.
Damkës i ishte ndërprerë masa e arrestit shtëpiak më 7 mars.
