Kryeministri Albin Kurti është deklaruar rreth takimit të së premtes me presidentin turk, Recep Tayyip Erdogan në Ankara.
Ai ka thënë se në këtë takim kanë diskutuar për mundësitë e reja të bashkëpunimit në fushën e ekonomisë dhe të mbrojtjes, e gjithashtu edhe për marrëdhëniet dypalëshe.
“Të hënën do të mbahet forumi i parë ekonomik për bizneset nga Kosova dhe Turqia, ku ofrohet mundësia për thellimin e lidhjeve dhe nxitjen e investimeve”, ka shkruar Kurti në platformën X.
Siç është raportuar nga mediet turke, takimi midis Kurtit dhe Erdoganit ka qenë i mbyllur për media dhe ka zgjatur rreth dy orë.
Bashkë me Erdogan në takim kanë qenë zvëndëspresdienti Cevdet Yilmaz dhe ministri i Mbrojtjes, Yasar Guler.
Today I was welcomed in Ankara by President @RTErdogan. We discussed bilateral relations & new opportunities for economic and defense cooperation. On Monday the first economic forum for businesses from 🇽🇰 and 🇹🇷 will be held, providing a chance to deepen ties & boost investments. pic.twitter.com/RYHvZh43Vv
— Albin Kurti (@albinkurti) May 31, 2024
Kurti pritet në Ankara nga Erdogani
(E përditësuar 14:05) Kryeministri Albin Kurti ka takuar presidentin e Turqisë, Recep Tayyip Erdogan, në Ankara.
Në faqen e Presidencës turke janë publikuar fotografitë e takimit, ndërkohë Kurti pati njoftuar më herët për vizitën e tij në Turqi.
Kurti udhëton në Turqi, do të takohet me Erdoganin
Kryeministri, Albin Kurti, i shoqëruar nga zëvendëskryeministri, Besnik Bislimi, dhe zëvendëskryeministrja Emilija Rexhepi ka udhëtuar të enjten mbrëma drejt Turqisë.
Në një njoftim të Zyrës për media të Kryeministrisë, thuhet se në kryeqytetin e Turqisë, Ankara, “ai do të mirëpritet nga presidenti i Republikës së Turqisë, Recep Tayyip Erdogan, si dhe do të takohet edhe me ministrin e Punëve të Jashtme, Hakan Fidan”.
Qëndrimin në Turqi, Kurti do ta vijojë në Stamboll, ku thuhet se do të marrë pjesë në forumin e parë ekonomik të bizneseve ndërmjet Kosovës dhe Turqisë.
Kurti të enjten në Prishtinë ka pritur në takim të enjten ambasadorin e Turqisë në Kosovë, Sabri Tunç Angili.
Në njoftimin e lëshuar nga Zyra e Kryeministrit, thuhej se ditëve në vijim mund të ketë një takim midis Kurtit dhe presidentit të Turqisë, Recep Tayyip Erdogan, si dhe me ministrin e Punëve të Jashtme, Hakan Fidan.
“Në Stamboll do të mbahet edhe Forumi i parë Ekonomik mes Republikës së Kosovës dhe Turqisë ku do të marrin pjesë biznese të shumta nga Kosova dhe Turqia si një mundësi unike për të zgjeruar mundësitë e bashkëpunimit ekonomik dhe tregtar”, thuhej në njoftimin e lëshuar nga ZKM-ja.
