Kurti: Më brengosëse se sanksionet ndërkombëtare është milicia fashiste në veri

“Është shqetësuese, është brengosëse, por më shqetësuese dhe më brengosëse janë milicia fashiste në veri. Shpeshherë në politikat qeveritare, në vendimet ekzekutive, nuk ke opsione ideale, e shpeshherë as optimale. Pra, vendimet, opsionet ideale janë luks e nganjëherë madje edhe optimale. Në këtë kontekst, unë besoj se kam bërë zgjedhjen më të mirë të mundshme. Më lejoni ta sqaroj se në dhjetor i kemi shtyrë zgjedhjet për katër muaj. Thanë shtyni zgjedhjet, i shtymë zgjedhjet. Pastaj, i mbajtëm zgjedhjet, thanë i njohim zgjedhjet. Të huajt, ambasadorët, jo vetëm ambasadori amerikan, ne na u lut, na tha, nëse bën mos të bëhet betimi, sepse betimi e ka atë pompozitetin. Mirëpo vend të punës tjetër nuk mund të ketë”, ka thënë Kurti

Kryeministri Albin Kurti i ka kualifikuar të enjten si shqetësuese dhe brengosëse masat ndëshkuese ndërkombëtare ndaj Kosovës, shkaku i zhvillimeve në veriun e banuar kryesisht me serbë, porse ai e ka vlerësuar si edhe më brengosës e ka cilësuar praninë e “milicisë fashiste” në këtë pjesë të vendit.

Kurti, në një intervistë për emisionin “Konfront” të KTV-së, ka thënë se zhvillimet e së premtes së shkuar dhe të hënës së kësaj jave kanë demonstruar se ka eksponentë të ndryshëm që janë në kuadër të policisë së xhandarmërisë serbe në Serbi dhe të cilët dëshirojnë të kenë një makinë kohore kur kanë më shumë se nostalgji për periudhën e viteve '90. Ai ka shtuar se Kushtetuta e kërkon që në Kosovë të mos ketë individë dhe banda më të fuqishme sesa shteti. Kryeministri Kurti i ka komentuar edhe reagimet e faktorit ndërkombëtar, nga i cili i janë adresuar kritika për vendimin që t’i shoqërojë kryetarët e rinj me polici në objektet e komunave të Leposaviqit, Zveçanit dhe Zubin-Potokut.

“Aleatët ndërkombëtarë, partnerët tanë, të cilëve u jemi pafundësisht, përjetësisht falënderues e mirënjohës, janë shumë të mirë, janë intensifikuar në këta dy vjet dhe ata e kanë njohur Republikën e Kosovës me kufijtë që i kemi në hartën në flamur. Dhe ne nuk po bëjmë asgjë më shumë ose më pak se kushtetutshmëria dhe ligjshmëria. Tash, mund të kemi taktika e strategji, mirëpo u dëshmua që karshi bandave nacionalshoviniste, të ekstremit të djathtë, çfarëdo gjeneroziteti, çfarëdo bujarie, çfarëdo sjellje tolerante, keqkuptohet si frikë ose dobësi”, ka thënë Kurti. “Unë ka dy vjet që bashkëpunoj me ambasadorët e QUINT-it, me ambasadorin e BE-së, në veçanti me ambasadorin amerikan. Nuk pajtohemi çdo herë për gjithçka. Nuk është normale të pajtohesh çdo herë me gjithçka”.

Kurti e ka komentuar edhe stacionimin e forcave ushtarake të Serbisë afër kufirit me Kosovën, si dhe vendimin e Qeverisë në Beograd për ngritjen e nivelit të gatishmërisë luftarake.

“Për shembull, kur ju thatë më herët që nëse sulmon Serbia forcat tona nuk i bëjnë ballë, nuk e di a është ashtu. Unë nuk do ta kisha paragjykuar. Natyrisht që mirë është të kesh ndihmë”, ka thënë ai.

KOHA: Ajo që po shohim sot në veri pak a shumë ishte skenar i paralajmëruar se mund të ndodhte. Megjithatë, e menduat se do të shkonte aq larg sa të ketë pjesëtarë të KFOR-it të plagosur e policë të lënduar nga njësitet e milicisë serbe?

Kurti: Së pari, ne mendojmë Kushtetutën dhe kushtetutshmërinë, e mendojmë ligjshmërinë, rendin dhe sigurinë e më pastaj, natyrisht, se i mendojmë faktorët e ndryshëm destabilizues, të cilët mund të jenë të tillë që jetojnë e veprojnë në veri të Kosovës, por edhe të tillë, të cilët nëpër rrugë ilegale hyjnë në Kosovë, siç ka ndodhur këto ditët e fundit, meqenëse prej kësaj milicie fashiste që e kemi parë edhe të premten, por sidomos të hënën, kemi eksponentë të ndryshëm të cilët janë në kuadër të policisë së xhandarmërisë serbe në Serbi, dhe të cilët dëshirojnë të kenë një makinë kohore kur kanë më shumë se nostalgji për periudhën e viteve '90, kur ne ishim të okupuar e të pushtuar. Njerëz të cilët nuk dëshirojnë ta pranojnë shekullin 21, nuk dëshirojnë ta pranojnë Kosovën e pavarur dhe e përdorin si pretekst hyrjen e tre kryetarëve të zgjedhur, ndonëse me pak vota, në objektet zyrtare publike të komunave.

KOHA: Si e cilësoni sigurinë sot në veri? Si do ta kategorizonit, sipas shkallës së rrezikshmërisë?

Kurti: Shkalla e rrezikshmërisë mund të thuhet që është e lartë rrotull ndërtesave të komunave. Ndërkaq, për vendbanimet e tjera në veri të Kosovës nuk ka diçka të pazakonshme. Kjo në fakt tregon që populli atje nuk është duke i bërë këto protesta, se populli bën protesta paqësore, por këto protesta janë protesta prej lart e jo prej poshtë. Duke qenë të dirigjuara e të dhunshme, në fakt nuk janë fare protesta, bëhet fjalë për turma të nacioshovinizmit serb, të ekstremit të djathtë, të cilët dëshirojnë pushtet e sovranitet që do të nënkuptonte asgjë më pak sesa nënshtrime dhe dorëzimin e Republikës demokratike.

KOHA: Megjithatë, nisi si protestë popullore, por pastaj qytetarët u tërhoqën dhe dolën ata që i pamë të gjuajnë e të lëndojë qoftë pjesëtarë të KFOR-it, qoftë policë. Njësia Speciale po i ruan objektet e komunave dhe flamujt e ngritur atje, por KFOR-i po i ruan njësitet speciale. A ka kuptim të mbahen njësitet speciale nëse nuk kanë urdhër të veprojnë më shumë se të ruajnë objektin?

Kurti: Të premten nuk ka pasur protesta paqësore, përveçse të hënën ka pasur turma të dhunshme. Sepse pikërisht të premten thoshin “ubij-ubij”, “vrite-vrite”. Nuk janë protesta paqësore aty kur dikush bërtet “vrite-vrite”, dhe njësia jonë speciale nuk e bën aksionin e saj nga dëshira, por nga obligimi. Nëse nuk do të kishte turma të dhunshme me eksponentë kriminalë rrotull ndërtesave komunale, ne do të mundemi që gradualisht ta zvogëlojmë praninë e njësive tona speciale në këto ndërtesa komunale, dhe një ditë të jetë fare simbolike sikur në komunat e tjera. Por, përderisa ka turma të dhunshme e kriminale jashtë, përderisa vijnë njerëz me maska, bëjnë grafite kryqi me katër “S” e “Z”-ja të invazionit rus në Ukrainë, përderisa bërtasin për vëllazërinë e popullit serb dhe rus, përderisa kemi njerëz që hapur adhurojnë edhe Milosheviqin, edhe Putinin, natyrisht se Njësia Speciale duhet të jetë në ndërtesë të komunës. Është papërgjegjësi nëse ne nuk do ta kishim Njësinë Speciale aty, prandaj edhe ne jemi të obliguar të bëjmë këtë që po bëjmë në një kurs të veprimeve, ku pas mbajtjes së zgjedhjeve, pranimit të procesit, njohjes së rezultatit, betimit shumë të vakët pa kurrfarë triumfalizmi, fillon puna ku tjetër përveçse në objekte zyrtare publike të komunave përkatëse.

KOHA: Megjithatë, krejt kjo situatë po mbetet e tillë, duke insistuar t’i mbani kryetarët atje, por atje keni vetëm dy kryetarë, ata janë nga radhët e partisë suaj, dy të tjerët nga PDK-ja nuk iu dëgjuan dhe nuk po rrinë nëpër komuna. Çka tregon kjo për koordinimin tonë të brendshëm si shtet, por edhe bashkëpunimin me opozitën në këtë moment?

Kurti: Nuk bën të kemi parti më të rëndësishme sesa shteti për asnjë anëtar partie apo qytetar të Republikës. Vendi i punës së kryetarit është në ndërtesë të komunës. Atyre është duke iu ecë rroga, ata janë në marrëdhënie pune, unë e di që dalja ka qenë e ulët, legjitimiteti nuk është çfarë do të duhej, mirëpo derisa të mbahen zgjedhjet e reja, i kemi katër kryetarë çfarë i kemi. Dy janë të LVV-së, dy të PDK-së, por këta nuk përfaqësojnë partitë e tyre aty. Këta janë kryetarë të komunës, të cilët duhet të punojnë për të gjithë qytetarët, pa dallim. Instruksioni që kam dhënë është që të shkojnë jo vetëm të punojnë në ndërtesë, por kabinetet e tyre qeveritare, lokale, të jenë multietnike, multikulturore, multifetare dhe multipartiake. Pra, partitë të bashkëpunojnë me njëra-tjetrën. Asnjëri prej tyre nuk e përfaqëson as Vetëvendosjen, as Partinë Demokratike, por duhet t'ju shërbejnë edhe serbëve. E unë do t’u thosha, në veçanti serbëve, sepse janë megjithatë shumicë në ato komuna.

KOHA: Megjithatë, në këtë rast ata nuk dëgjuan rekomandimet nga ju, por ambasadorin amerikan dhe shkuan në takim e dy kryetarët nga partia juaj nuk shkuan tek ambasadori?

Kurti: Ata janë ftuar në një takim që ka qenë në orar të punës.

KOHA: Në këtë rast, a e shmangën dy kryetarët nga radhët e PDK-së, si të themi, hierarkinë nga ju?

Kurti: Ata kanë shkuar në orarin e tyre të punës, dhe kjo nuk do të thotë që nuk do të mund ta takojnë sërish ambasadorin amerikan Hovenier, me të cilin kemi bashkëpunim tejet të mirë, dhe atë evropian Szunyog. Mirëpo ai ka qenë orari i punës dhe në ato momente është vlerësuar që është e rëndësishme të jenë aty. Unë shpresoj që këta ambasadorët së shpejti do t'i vizitojnë edhe atje në ato zyra. Pra, është njohur procesi zgjedhor, është njohur rezultati, ne nuk mund të krijojmë struktura paralele të Kosovës në raport me strukturat paralele të Serbisë. Andaj, në ato objekte do të duhej që ambasadorët, po ashtu, t’i vizitojnë, siç i vizitojnë komunat e tjera. Por, natyrisht, nëse ftohen kryetarët tanë nga ambasadorët, edhe këta duhet të shkojnë tek ata. Por ajo ka qenë një ditë e veçantë, ku prej Leposaviqit të shkohet në Prishtinë me gjithë ato turma rrotull, unë besoj që e ka marrë vendimin e duhur që të qëndrojë në zyrë atë ditë kryetari Lulzim Hetemi. Dhe në këtë mënyrë, kur po sulmohej KFOR-i, NATO-ja, kur po sulmoheshin gazetarët, kur po sulmohej Policia e Kosovës. Unë besoj që është dashur të jetë aty, e jo në Prishtinë.

KOHA: Veprimet e juaja për të shtrirë legjitimitetin në veri kanë nxitur një valë reagimesh nga BE-ja deri te Departamenti Amerikan i Shtetit. Insistimi për të qëndruar në të drejtën e juaj, a i rrezikon raportet e Kosovës me aleatët ndërkombëtarë?

Kurti: Aleatët ndërkombëtarë, partnerët tanë, të cilëve u jemi pafundësisht, përjetësisht falënderues e mirënjohës, janë shumë të mirë, janë intensifikuar në këta dy vjet dhe ata e kanë njohur Republikën e Kosovës me kufijtë që i kemi në hartën në flamur. Dhe ne nuk po bëjmë asgjë më shumë ose më pak se kushtetutshmëria dhe ligjshmëria. Tash mund të kemi taktika e strategji, mirëpo u dëshmua që karshi bandave nacionalshoviniste, të ekstremit të djathtë, çfarëdo gjeneroziteti, çfarëdo bujarie, çfarëdo sjellje tolerante, keqkuptohet si frikë ose dobësi. Pra, në momentin që kryetari i komunës nuk shkon atje, a mendoni që do të jenë falënderues ata? Ata do të thonë “u frikësuan”, ata do të thonë “e shihni, janë të dobët”. Republika e Kosovës është e fortë. Nuk ka individë...

KOHA: Atë po synoni të tregoni në këtë moment?

Kurti: Atë e kërkon ligji, jo e tregoj unë. Ligji kërkon, Kushtetuta kërkon, që në Republikën tonë të mos ketë individë dhe banda më të fuqishme se shteti. Unë jam në këtë zyrë me këtë obligim, ky është obligim.

KOHA: Pra, nuk lëvizni nga obligimet pavarësisht rekomandimeve të aleatëve ndërkombëtarë, në veçanti Shteteve të Bashkuara të Amerikës, që në këtë moment të ketë një konsideratë dhe të jetë në qetësi, marrë parasysh zhvillimet më të mëdha që po ndodhin në Evropë - lufta në Ukrainë?

Kurti: Karshi ditës së hënë, kur u bë ai sulm nga i cili u lënduan dhjetëra ushtarë të NATO-s, por edhe gazetarë, të cilëve u dëshiroj shërim të plotë dhe rehabilitim të shpejtë, ditët në vijim duhet ta pranoni që ishin më të qeta. Pse ishin më të qeta? Sepse nuk pati sulme të kriminelëve. Pra, nëse dëshironi qetësi dhe paqe, nuk duhet të ketë sulme të kriminelëve.

KOHA: Megjithatë, sulmi u drejtua kah gazetarët... pati sulme.

Kurti: E vërtetë. Unë thashë më të qeta, nuk thashë që pati paqe, qetësi, por ishin dukshëm më të qeta për shkak se sulmet e tyre nuk ishin agresive...

KOHA: Ambasadori amerikan po insiston që ju nuk u koordinuat, nuk dëgjuat këshillat e tij për të mos vepruar. Ju keni deklaruar dhe po insistoni që keni një bashkëpunim të mirëfilltë me ta. Në takimet që keni pasur paraprakisht, para se të merreshin këto veprime, ju treguat se çfarë keni ndërmend të bëni apo vepruat pas shpinës së tyre?

Kurti: Si mund të veprojë kryeministri pas shpinës së një ambasadori në atë vend?

KOHA: Në kuptimin që ai tha që “i kam rekomanduar të mos veprojë”, por ju e bëtë?

Kurti: Kjo nuk është normale, një republikë demokratike. Duhet ta keni të qartë, situata në të cilën jemi është për shkak të agresivitetit të Serbisë, e cila nuk distancohet as nga Milosheviqi, as nga Putini, dhe financon banda që i adhurojnë këta të dy.

KOHA: Ne e kemi të qartë, besoj të gjithë qytetarët e kanë të qartë, aleatët ndërkombëtarë sa e kanë të qartë? Sa po arrini ju t'i bindni ata?

Kurti: Ata e kanë gjithnjë e më të qartë dhe unë do t'i bindi më kollaj nëse më ndihmoni më shumë. Por edhe nëse nuk më ndihmoni, bindja do të ndodhë, sepse Republika e Kosovës është ndërtuar me gjakun e dëshmorëve dhe martirëve. Në anën tjetër, Republikën e mban Kushtetuta me ligj dhe institucione. Këtij populli unë duhet t'i dal zot, sepse për këtë më kanë sjellë në këtë karrige. Unë kam vlerësimin dhe respektin më të lartë për ambasadorin Hovenier, mund të them në mënyrë fort të veçantë krahasuar edhe me të gjithë ambasadorët e tjerë, por mua më ka votuar populli, nuk më ka emëruar ambasadori. Duhet ta kuptoni këtë gjë. Mua më ka votuar populli i Kosovës, populli i Kosovës të voton, populli edhe të heqë. Nuk është emërim kryeministri, kryeministri është zgjedhje e atij që është burim i sovranitetit.

KOHA: Marrë parasysh se si kemi vepruar, si kemi rrugëtuar gjatë tërë pasluftës e tutje, ka qenë ndoshta rekomandim për hir të disa zhvillimeve më të mëdha që po ndodhin jashtë kufijve tanë?

Kurti: Unë ka dy vjet që bashkëpunoj me ambasadorët e QUINT-it, me ambasadorin e BE-së, në veçanti me ambasadorin amerikan. Nuk pajtohemi çdo herë për gjithçka. Nuk është normale të pajtohesh çdo herë me gjithçka.

KOHA: Por në publik nuk kemi dëgjuar deri tani një, le të themi, “kërcënim” aq serioz të Ambasadës amerikane, konkretisht ambasadorit amerikan, për lëndim raportesh të Kosovës me SHBA-në, apo edhe për masa, sanksione të mundshme. Kjo është shqetësuese apo jo? Duket sikur ka krijuar panik te një pjesë e qytetarëve?

Kurti: Është shqetësuese, është brengosëse, por më shqetësuese dhe më brengosëse janë milicia fashiste në veri. Shpeshherë në politikat qeveritare, në vendimet ekzekutive, nuk ke opsione ideale, e shpeshherë as optimale. Pra, vendimet, opsionet ideale janë luks e nganjëherë madje edhe optimale. Në këtë kontekst unë besoj se kam bërë zgjedhjen më të mirë të mundshme. Më lejoni ta sqaroj se në dhjetor i kemi shtyrë zgjedhjet për katër muaj. Thanë shtyni zgjedhjet, i shtymë zgjedhjet. Pastaj, i mbajtëm zgjedhjet, thanë i njohim zgjedhjet. Të huajt, ambasadorët, jo vetëm ambasadori amerikan, ne na u lut, na tha, nëse bën mos të bëhet betimi, sepse betimi e ka atë pompozitetin. Mirëpo vend të punës tjetër nuk mund të ketë.

KOHA: Në shtypin ndërkombëtar interpretuat qëndrimin e sekretarit Blinken dhe thatë që prisni të ketë një shpjegim ose zbërthim të asaj çfarë ka menduar në ditët në vijim. Çfarë prisni të shpjegojë më shumë ai? A keni pasur ndërkohë komunikim me ambasadorin amerikan pas atyre që dolën në media dhe këtyre paralajmërimeve se mund të ketë sanksione?

Kurti: Komunikimin me ambasadorin amerikan e kam të përditshëm, takimet me të janë së paku të përjavshme, por mos prisni prej meje, si kryeministër i Republikës, që të pajtohem tërë kohën për gjithçka. Njeriu nuk është identik as me vetveten, sepse çka mendon sot, nuk është e thënë se mendon pas një muaji. Njeriu ka edhe vetëdilema, kritika në shoqëri është e shëndoshë, mirëpo duhet me e dashtë këtë vend shumë. Duhet me e dashtë shumë këtë vend e dashuria për këtë vend kurrë nuk ka qenë më e qartë sesa tani që duhet të matet me luftimin e këtyre grupeve fashiste. Veç duhet me e dashtë këtë vend.

KOHA: Vuçiqi solli trupat ushtarake në kufi dhe ngriti shkallën e gatishmërisë në gjendje lufte. Duke qenë se kjo paraqet një agresion të hapur, sa jeni ankuar për këtë konkretisht tek aleatët ndërkombëtarë? Besojmë që ata e dinë se çka do të thotë t’i sjellësh trupat ushtarake në kufij të tjetrit, por ju sa keni alarmuar për këtë pikë?

Kurti: Në dhjetor kërkuan që të kthehen 1000 ushtarë, nuk është asgjë e re. Tash e dy vjet flas se si janë 48 baza të përparme ushtarake e të xhandarmërisë rrotull kufirit të Kosovës. 28 dhe 20 sosh, 48 gjithsej në të ashtuquajturën “zona e sigurisë”. Prej gushtit të vitit 2001 janë aty. Unë jam kryeministri i parë që i tregoj këto gjëra. Edhe kam treguar për lidhjet e Serbisë me Rusinë, edhe në vitin 2022 kam kërkuar forca shtesë të NATO-s në Kosovë. Gjeni disa intervista të mia edhe për mediat ndërkombëtare, edhe vendore ku unë them nuk mjaftojnë më pak se 4000 ushtarë. Unë mendoj që nuk kemi nevojë të na ndodhin zhvillime të tjera negative nga fashistët serbë që të kuptohet se duhet të përpiqemi më shumë për mbrojtjen tonë. E kam rritur mbi 100 për qind buxhetin për mbrojtje dhe siguri, dhe e kam rritur mbi 80 për qind rekrutimin e ushtarëve të rinj në FSK. Pse i kam bërë unë këto gjëra?

KOHA: Me siguri se këto nuk mjaftojnë për t’i përballuar agresionit të Serbisë që po mban trupat në kufij. Gjithsesi do të ishte e drejtë që aleatët të bënin më shumë presion mbi Serbinë. Andaj po them sa keni punuar ju që presioni të kthehet mbi Serbinë, pasi duket se i gjithë presioni po bie mbi ne?

Kurti: Mbi ne, apo mbi mua, apo mbi ju? E pra, le ta mbrojmë Kosovën, duhet ta duam këtë vend, këtë po e them. Le ta mbrojmë bashkë Kosovën.

KOHA: Në forumin e Bratislavës pranuat se këta janë kryetarë teknikë dhe mund të ketë raund të ri zgjedhjesh. Kur do të jenë zgjedhjet e radhës dhe sa urgjente është të mbahen menjëherë? Keni afat kohor kur e paramendoni të tejkalohet kjo krizë?

Kurti: Mund të paramendoj që ka kryetarë nëpër komunat e Kosovës që do të rizgjidhen herën e ardhshme, ka kryetarë që nuk do të rizgjidhen. Është shumë vështirë ta imagjinojmë që këta katër kryetarë atje do të rizgjidhen. Mirëpo nuk mund të ketë kryetar që vjen pa zgjedhje, kjo është e rëndësishme njëherë që të vendoset, më pas dhe ne flasim se kur do të mund të bëheshin zgjedhjet e ardhshme.

KOHA: Pritet të ketë zgjedhje me marrëveshje politike?

Kurti: Asnjëherë duke shkelur çfarëdo ligji ose rregulli në Kosovë. Është KQZ-ja, është zonja presidente, është Kuvendi i Republikës, është Qeveria.

KOHA: Mund të rezultojë në situatë të njëjtë, ku partitë serbe s’do të dalin në garë...

Kurti: Unë e paramendoj si aktivist politik... si aktivist politik për nga vokacioni, unë e paramendoj edhe situatën në të cilën serbët do të bëjnë protesta për zgjedhje të parakohshme, paqësore, paqësore për zgjedhje të parakohshme. Do ta kenë një dëgjues të mirë prej kryeministrit të Kosovës.

KOHA: Opozita po kërkon mocion mosbesimi ndaj jush. Do t’i mbijetonte një mocioni të tillë Qeveria juaj?

Kurti: Unë veproj sipas programit tonë qeveritar, ligjit dhe Kushtetutës, nuk mund të bëj parashikime se çfarë do të ndodhë në të ardhmen. Për shembull, kur ju thatë më herët që nëse sulmon Serbia, forcat tona nuk i bëjnë ballë, nuk e di a është ashtu. Unë nuk do ta kisha paragjykuar. Natyrisht që mirë është të kesh ndihmë.

KOHA: Ndoshta duhet t’ia dimë hallin vetes...

Kurti: Unë mendoj që duhet të besojmë në veten para se t’ia dimë hallin vetes. Hallin t’ia dimë është hapi i dytë, hapi i parë është të besojmë në veten. Më pas dija hallin vetes. Nëse ia fillojmë t’ia dimë hallin vetes do të mbesim... jo bash shtet. E unë po them të bëhemi si e kemi emrin, Republikë e Pavarur dhe Demokratike.

KOHA: Kthehemi te mocioni i mosbesimit...

Kurti: Kjo tash ka të bëjë me besimin e atyre, kjo është një çështje tjetër. Pra, është vetëbesimi i atyre, për çështjen e mocionit nuk e di, s’e parashikoj dot.

KOHA: Meqë jemi në situatë ku aleatët po kërkojnë diçka tjetër, ju duket sikur jeni në drejtim krejt tjetër, duke insistuar në të drejtën që u jep Kushtetuta, ka fjalë që është e preferueshme nga aleatët ndërkombëtarë të ketë qeveri teknike për t’i mbyllur hesapet me Serbinë. Mendoni se një qeveri e tillë do të jetë në projeksionet për të ardhmen të aleatëve tanë për të shpërndarë përgjegjësinë te krejt subjektet politike në vendim përfundimtar që do të na ndante njëherë e mirë rrugët me Serbinë?

Kurti: Shikoni, qeveritë zgjidhen në mënyrë demokratike në Kosovë nga Kuvendi i Republikës dhe unë nuk mendoj se duhet të zmbrapsemi tash dhe të tregojmë dobësi në kohën kur policia jonë është duke kryer punë të shkëlqyeshme, me profesionalizëm të lartë. Cili qenka ai dështim i shtetit tonë që na u dashka neve tash të zmbrapsemi e të rishqyrtojmë? Në fakt, ne duhet ta shohim kryetarin tonë në ndërtesë të komunës në veri të Kosovës si sukses të shtetit e të kësaj qeverie, jo si dëmtim të shtetit apo dështim të Qeverisë. Pra, pse do të duhej kur shteti ka sukses, në këta dy vjet kemi bërë bashkë edhe progresin demokratik, edhe ekonomik, mbi 7 për qind rritje ekonomike, dyfishim të investimeve të huaja, 2/3 janë rritur të hyrat tatimore, në Transparency International, World Justice Project, Freedom House, Electoral Democracy, krejt po dalim të parët në Ballkan. Pse do të duhej që nga ky sukses të sillemi si dështakë? Kosova është e suksesshme. Republika e Kosovës është rrëfim i suksesshëm i ndërhyrjes së NATO-s për ta ndalur gjenocidin e Serbisë edhe i lidhjes së progresit demokratik dhe ekonomik.

KOHA: Ka edhe gjykim që thuhet se e tërë kjo po bëhet në koordinim me aleatët ndërkombëtarë për të arritur diçka tjetër në negociata, për ta çuar përpara Asociacionin?

Kurti: Republika është para së gjithash dhe mbi të gjitha, më janë lënë disa marrëveshje nga ata që kanë shkuar, është e vërtetë, më janë lënë disa marrëveshje.

KOHA: A po bëhet kjo në veri për diçka më të madhe?

Kurti: Kjo në veri po bëhet, sepse afati për ta dhënë betimin ka qenë 28 maji. Nuk e kam përcaktuar unë afatin, këto janë afate ligjore kushtetuese, unë jam në shërbim, unë jam infrastrukturë e zbatimit, mundësimit, garantimit të ligjit, kaq është kjo punë. Zgjedhjet, organizimin e komunave në Kosovë ne i kemi trashëguar, pra, ato janë aty dhe unë i mirëmbaj me përpikëri dhe me besim të fuqishëm në shtetin tonë.