Kurti: BE-ja, fati e qëllimi ynë

Kryeministri i Kosovës, Albin Kurti, ka deklaruar se Bashkimi Evropian është qëllimi dhe fati i Kosovës dhe i vendeve të Ballkanit Perëndimor, duke shtuar se sot do të dorëzojë listën e reformave të diskutuara.

Në nisje të takimit në kuadër të “Planit të Rritjes për Ballkanin Perëndimor”, Kurti është shprehur të hënën se Bashkimi Evropian, Shtetet e Bashkuara të Amerikës do të mundësojnë sa më shumë bashkëpunim rajonal dhe “ecje më të përshpejtuar drejt BE-së që është qëllimi e fati ynë”.

Sipas Kurtit, Brukseli e Uashingtoni janë të angazhuara me Ballkanin Perëndimor për rritje ekonomike.

“Vlerat e BE-së duhet të bëhen reforma, ndërkaq mbështetja e BE duhet të jetë financiare. Republika e Kosovës sot do të dorëzojë listën e reformave të diskutuara, ndërkaq në ditët në vijim, do të dorëzojmë listën e projekteve indikativë. Sa i përket reformave, aty e kemi në qendër reformën e administratës...Ndërkaq, për projekte e kemi energjinë e gjelbër”, është shprehur Kurti.

Kryeministri i Shqipërisë, Edi Rama, ka thënë se nisma e vendeve të Ballkanit Perëndimor është mundësi e mirë që nuk duhet humbur, derisa ka shtuar se “është kruciale që t’i vendosim qytetarët tanë në rend të parë”.

“Është kruciale dhe nëse mund ta bëjmë në kohë reale për t’u realizuar gjërat në muajt e ardhshëm që t’i definojmë se si do të duken vendet tona”, tha Rama.

Presidenti i Serbisë, Aleksandar Vuçiq e ka falënderuar Maqedoninë e Veriut për mikpritje. Ai ka thënë se kanë pasur dhe do të kenë takime të rëndësishme për përparimin e Ballkanit Perëndimor. Ka thënë se është biseduar me përfaqësues evropian e amerikan për planin e rritjes.

Vuçiq ka thënë se është me rëndësi inkuadrimi në Tregun e Përbashkët. Ndërkohë ka folur edhe se do të nënshkruhen më 1 mars dy protokolle në kuadër të “Ballkanit të Hapur” që kanë për qëllim lëvizjen e lirë të punëtorëve.

“Ne kemi biseduar edhe për planin e zgjerimit të BE-së. Kemi biseduar për kushtet që duhet plotësuar dhe reformat”, ka thënë Vuçiq.

Kryeministri i Malit të Zi, Milojko Spajiq, ka thënë se plani i rritjes së BE-së paraqet një mundësi të mirë për gjithë rajonin e Ballkanit Perëndimor. Ai ka thënë se shpreson që të nisë sa më shpejt.

“Është sinjal i rëndësishëm jo vetëm për shtetet e Ballkanit Perëndimor, por edhe bizneset që duan të investojnë në Ballkan Perëndimor”, ka thënë Spajiq.

E drejtori i përgjithshëm për fqinjësinë dhe negociatat e zgjerimit në Komisionin Evropian, Gert Jan Koopman, ka thënë se ky plan mund ta rrisë dyfishë ekonominë e rajonit në dekadën e ardhshme.

“Është inkurajuese të shoh se si rajoni e ka përqafuar këtë koncept. Po punon fortë në reforma që ndihmojnë drejt kësaj rritje. Liderët do të diskutojnë për tregun e përbashkët rajonal, e integrimin në mënyrë progresive në tregun e përbashkët të BE-së, që është shtytës i madh i rritjes ekonomike”, ka thënë Koopman.

E ndihmësekretari amerikan i shtetit për Evropë e Euroazi, James O’Brien, ka thënë se ky plan i rritjes i BE-së nuk është më ndryshe.

“Nuk është se duhet bërë reforma e më vonë do të vlerësoheni. Thotë se nëse bëni reforma të caktuara, atëherë kompanitë e njerëzit tuaj do të kenë katër liritë e BE-së. Të gjitha pajtohemi se duhet të kemi gjashtë shtetet e rajonit duke punuar bashkë, që njerëzit në rajon të kenë mundësi të ecin përpara”, ka thënë O’Brien.