Kurti: Asnjë gjykatë vendore apo ndërkombëtare nuk mund ta njollosë UÇK-në

Mandatari për formimin e Qeverisë, Albin Kurti, në fjalimin e tij ka thënë se të gjithë janë në ankth para vendimit të procesit gjyqësor ndaj drejtuesve të UÇK-së në Hagë.

Ai e ka konsideruar të padrejtë dhe të pabesueshme kërkesën e prokurorisë.

Ka deklaruar se ajo është në shpërputhje me të vërtetën historike të popullit të Kosovës.

Ka thënë se asnjë gjykatë vendore a ndërkombëtare nuk mund ta njollosë UÇK-në.

“Të gjithë jemi në ankth në prag të vendimit të procesit gjyqësor ndaj drejtuesve të UÇK-së, Hashim Thaçit, Jakup Krasniqit, Rexhep Selimit e Kadri Veselit. Kërkesa e Prokurorisë është e padrejtë, e pabesueshme, në shpërputhje me të vërtetën historike të popullit tonë dhe me drejtësinë e luftës sonë çlirimtare. Qëndrimi i Qeverisë së Kosovës do të jetë i njëjtë dhe i qartë. Në Kosovë janë kryer krime kundër njerëzimit, krime lufte e gjenocid ndaj popullatës civile shqiptare. Ato janë kryer nga regjimi i Jugosllavisë së Serbisë, nën udhëheqjen e Millosheviqit. Asnjë gjykatë vendore e ndërkombëtare s’mund ta njollosë UÇK-në”, ka thënë ai.