Kryetarët e komunave pajtohen që ora policore të vazhdojë edhe pas 13 prillit

Koronavirusi i bëri bashkë kryetarët e komunave për të diskutuar rreth masave që do të ndërmerren pas 13 marsit, kur edhe hyn në fuqi vendimi i Gjykatës Kushtetuese.

Për dy orë rresht, në takimin që u mbajt në Drenas, u fol rreth problemeve me të cilat ata po ballafaqohen aktualisht, raporton KOHA.

Ndër problemet më të theksuara ishte mungesa e materialeve mbrojtëse për stafet e QKMF-ve.

Ata janë pajtuar që orari i lëvizjes së lirë të jetë i njëjtë në të gjitha komunat.

Kryetarët e komunave kanë dalë me një sërë rekomandimesh për Ministrinë e Shëndetësisë.

Mes tyre, kryetarët e komunave kanë kërkuar të informohen nga IKSHPK për personat e prekur, fillimin e zbatimit të pakos fiskale emergjente, shkakun e rritjes së nevojave për luftimin e COVID-19 dhe ngritjen e dinamikës nga ana e Qeverisë për shpërndarjen e materialit mbrojtës për QKMF-të.

Gjithashtu, është kërkuar edhe rritja e numrit të testeve për personat e dyshuar me COVID-19 dhe heqja e barrierave administrative për komunat, për blerjen e pajisjeve për luftimin e përhapjes së COVID-19.