Instituti Demokratik i Kosovës (KDI) ka shprehur shqetësimin për dështimin e përsëritur të Kuvendit në miratimin e raportit të Komisionit për verifikimin e mandateve, një hap kyç për konstituimin e legjislaturës së re.
Në një reagim publik pasi të enjten dështoi për të dytën herë seanca konstituive, KDI-ja thekson se mosdorëheqja formale e kryeministrit dhe ministrave në detyrë, të cilët janë zgjedhur si deputetë, përbën jo vetëm shkelje të parimeve të ndarjes së pushteteve, por edhe pengesë të drejtpërdrejtë në procesin e votimit të raportit të Komisionit. Kjo, sipas KDI-së, po e paralizon funksionalitetin institucional të Kuvendit.
“Ligji është i qartë. Anëtarët e ekzekutivit duhet të japin dorëheqje para certifikimit të rezultateve të zgjedhjeve. Kushtetuta ndalon ushtrimin e funksioneve të papajtueshme me mandatin e deputetit. Kjo nuk është çështje teknike apo e interpretimeve procedurale, por një shkelje e normave demokratike”, thuhet në deklaratë.
KDI kritikoi edhe mënyrën se si kryesuesi i seancës, deputeti Avni Dehari, e mbylli seancën konstituive sot pa hedhur në votim raportin dhe pa përmbyllur asnjë pikë të rendit të ditës, veprim që konsiderohet në kundërshtim me Rregulloren dhe praktikat parlamentare.
“Ky ngërç institucional, i shkaktuar nga mungesa e dorëheqjeve formale, është dëshmi e mungesës së vullnetit për të respektuar ligjin dhe për të lejuar funksionimin normal të institucioneve”, vlerësoi KDI.
Instituti i bën thirrje kryeministrit dhe ministrave në detyrë që të respektojnë obligimin ligjor për dorëheqje, në mënyrë që Kuvendi të mund të përfundojë seancën konstituive dhe të fillojë punën e tij.
“Institucionet nuk mund të konstituohen duke anashkaluar ligjin. Çdo zvarritje e mëtejshme është papërgjegjësi politike dhe cenon besimin e qytetarëve në procesin demokratik”, përfundon deklarata.
Te VV-ja insistojnë se kanë dhënë dorëheqje sipas procedurave, teksa opozita thotë se kjo s'ka ndodhur siç e parasheh Ligji për Qeverinë.
