Ish-kryeministri Hoti merr nënshtetësinë e Shqipërisë

Ish-kryeministri i Kosovës, Avdullah Hoti, ka marrë nënshtetësinë e Shqipërisë.

Deputeti nga radhët e LDK-së, Hoti, bashkë me 22 të tjerë, kryesisht nga Kosova, janë betuar të hënën para kryetarit të Tiranës, Erion Veliaj, për besnikëri ndaj shtetit të Shqipërisë dhe respektimin e Kushtetutës së Shqipërisë.

Gjatë ceremonisë së betimit, Veliaj tha se qyteti i Tiranës është i destinuar të rritet.

“Në këto 102 vjet si kryeqytet ne kemi pasur një eksperiencë të jashtëzakonshme - nisi si një qytezë e vogël, kurse sot është edhe kryeqyteti Evropian i Rinisë. Qyteti vjet u rrit me 32 mijë banorë, ose ndryshe 10 mijë apartamente dhe 10 mijë makina. Tirana është një qytet, i cili vetëm rritet dhe shërbimet ndaj qytetarëve kërkojnë standardet që kemi vendosur këto vite”, deklaroi ai.

Teksa vlerësoi shtetasit më të rinj për zgjedhjen që kanë bërë, Veliaj u shpreh se marrja e shtetësisë shqiptare duhet konsideruar si një mision për progres dhe për të çuar përpara ambiciet e vendit tonë. Ai nënvizoi se ndonëse Shqipëria është një vend i vogël, ajo jep një kontribut të rëndësishëm.

“Një pjesë e madhe e vëllezërve dhe motrave që bashkohen sot me shtetësinë e re, janë nga Kosova dhe kanë shumë të freskët plagën dhe gjithë tragjedinë e luftës. Rëndësia për të pasur qytete progresive, qytete me mendje të hapur, qytete ku ne gjejmë arsyet që na bashkojnë, jo të shikojmë dallimet që kemi me njëri-tjetrin, janë qytetet e të ardhmes! Ndaj, më vjen mirë që sot, 22 shtetas të rinj i bashkohen qytetit tonë, shtetit tonë, edhe misionit tonë për një Shqipëri që bën progres, edhe për një vend që modernizohet dita ditës”, theksoi kreu i Bashkisë.

Pas leximit të formulës, 22 shtetasit nga Kosova, SHBA-të, Egjipti, Turqia dhe Siria, nënshkruan edhe aktin e betimit.