-
Nga:
Kushtrim Kadriu
- 7 nëntor 2019 20:20
- Shpërndaje në:
Rezultatet përfundimtare e kanë nxjerrë liderin e Vetëvendosjes si më të votuarin në mesin e 5 kandidatëve për kryeministër.
Albin Kurti ka marrë më së shumti vota, gjithsej 183,868.
Pas Kurtit, me 176,188 vota, rreth 7 mijë vota më pak, renditet kandidatja e LDK-së për kryeministre, Vjosa Osmani, raporton KTV.
Kadri Veseli është radhitur i treti, larg dy kandidatëve të parë për kryeministër, me 146,763 vota.
Kryeministri në detyrë, Ramush Haradinaj, ka marrë vetëm 75,917, pak vota më shumë se deputeti i Vetëvendosjes Glauk Konjufca.
Ndërkaq, Fatmir Limaj, partia e së cilit në bazë të rezultateve përfundimtare të KQZ-së, nuk e ka kaluar pragun zgjedhor, ka marrë 26,014 vota.
Legjislatura VII, nuk do të këtë deputetë të disa legjislaturave të kaluara.
Xhavit Haliti i PDK-së, Ismet Beqiri i LDK-së, Sami Kurteshi i VV-së, e të tjerë kanë dështuar të bëhen deputetë.
Ndërkohë, deputetja më e re në moshë do të jetë Fjolla Ujkani nga Vetëvendosje.
Kjo parti ka siguruar 32 ulëse në Kuvend, LDK-ja 29, PDK-ja 25 deputetë. Ndërkaq AAK-ja së bashku me PSD-në, kanë marrë 14 ulëse në Kuvend.
Përveç Natyra Kuçit të PSD-së, kandidatët e kësaj partie, Shpend Ahmeti, Visar Ymeri, Dardan Molliqaj, Dardan Sejdiu, kanë dështuar të bëhen deputetë.
Madje, Dardan Sejdiu, i zhgënjyer nga rezultati i zgjedhjeve të 6 tetorit, ka dhënë dorëheqje nga funksionet partiake të PSD-së.
Kryetari aktual i Prishtinës, Ahmeti, ka marrë vetëm 5881 vota, për dallim prej para dy vitesh, kur me Vetëvendosjen fitoi 76.017 vota.
Lista Serbe ka siguruar 10 ulëse në Kuvend. Në mesin e deputetëve është edhe Ivan Todosijeviq, i cili i quajti shqiptarët terrorist dhe masakrën e Reçakut trillim, në kohën kur po udhëhiqte me Ministrinë e Pushtetit Lokal.
Ulëse në Kuvend ka fituar edhe Branislav Nikoliq, i cili për një periudhë ka shërbyer si këshilltar i presidentit Hashim Thaçi.
Më pas, ishte shkarkuar nga presidenti, vetëm pasi është raportuar në media se ka punuar si agjent i Shërbimit Sekret Serb.
