-
Nga:
Shpresë Hasimi
- 9 prill 2023 22:00
- Shpërndaje në:
“Trafiku Urban” ndodhet nën hetime lidhur me mosdeklarimin në kohë të një shume prej afro 50 mijë eurosh në monedha 2-euroshe, të dyshuara se janë të falsifikuara. Sipas burimeve të KOHËS, hetimet kanë nisur në funddhjetorin e shkuar, në kohën e barazimit të bilanceve vjetore. Në Polici i konfirmuan hetimet e nga ndërmarrja publike nuk pranuan të flasin rreth rastit me justifikimin se nuk duan t’i pengojnë hetimet
Ndaj ndërmarrjes publike “Trafiku Urban”, që nga dhjetori i vitit të shkuar janë iniciuar hetime policore lidhur me mosdeklarimin në kohë të një shume prej afro 50 mijë eurosh në monedha prej 2-eurosh, që dyshohen si të falsifikuara.
Burime të KOHËS treguan se hetimet u nisën pas deponimit të kësaj shume në bankë, në kohën e barazimit të bilanceve.
Sipas burimeve, shuma është grumbulluar gjatë vitit, pasi gjatë deponimeve të rregullta banka ia ka kthyer ndërmarrjes, në mirëkuptim, monedhat që nuk kanë kaluar në pajisjet e verifikimit.
E për këtë nuk ka lëshuar ndonjë vërtetim që dëshmon se ato dyshohet që janë të falsifikuara apo të dëmtuara.
Në Polici konfirmuan se rasti është duke u trajtuar në koordinim me prokurorinë, përderisa në ndërmarrjen publike “Trafiku Urban” nuk pranuan të flasin me justifikimin se nuk duan t’i pengojnë hetimet.
“Policia e posedon si informacion dhe është duke e trajtuar në bashkëpunim dhe koordinim me prokurorinë kompetente”, thuhet në përgjigjen e Policisë.
Përgjigje pyetjeve të KOHËS rreth moslëshimit të ndonjë vërtetimi për dyshimin se monedhat janë të falsifikuara apo të dëmtuara nuk kanë dhënë nga banka ku ndërmarrja i deponon të hyrat.
Përderisa në Bankën Qendrore, ndonëse nuk iu përgjigjën pyetjeve konkrete mbi rastin, thanë se falsifikimi i parasë përbën vepër penale që sanksionohet me nenin 302 të Kodit Penal.
“Sikurse edhe në çdo vend tjetër, edhe në Republikën e Kosovës falsifikimi i parasë është vepër penale dhe sanksionohet sipas nenit 302 të Kodit Penal të Republikës së Kosovës. Republika e Kosovës ka kapacitetet e veta ligjore dhe institucionale për luftimin e parasë së falsifikuar, andaj edhe lufta kundër kësaj dukurie është një aktivitet i përditshëm i institucioneve përgjegjëse”, thuhet në përgjigjen e Bankës Qendrore.
E neni 302 i Kodit Penal e parasheh masën e dënimit me burgim prej një deri në 8 vjet për këdo që e pranon dhe e vë në qarkullim me dijeni paranë e falsifikuar.
Policia gjatë vitit 2022 ka të iniciuara 804 raste për dyshimin e qarkullimit të monedhave dhe kartëmonedhave të falsifikuara, ndërsa 95 raste deri në fillim të shkurtit të sivjetmë.
Qarkullimi i tyre ka nxitur shumë tregtarë që të mos i pranojnë për pagesa.
Fehmi Prebreza, që ka një market në kryeqytet, thotë se konsumatorët nuk e marrin monedhën metalike 2 euro, ani pse, sipas tij, mundohet t’i verifikojë ato çdo herë përmes një magneti.
“Më problem ne shitësit e kemi për furnizim p.sh. kur e bien mallin edhe thonë vetëm ka 1 euro, vetëm të letrës, para të metalta jo. Unë ju them, ti p.sh. m’i jep 4 euro për një paqetë cigare 2.10 mos me t’i marrë a. Ne nuk kemi asnjë ligj p.sh. mos me t’i marrë paratë e metalta”, ka thënë Prebreza.
Qytetarët thonë se ka pasur raste që konduktorët e “Trafikut Urban” kanë dyshuar që 2 eurot janë të falsifikuara dhe nuk i kanë pranuar ato për të bërë pagesën.
Artiola Grabovci, nxënëse që udhëton çdo ditë për në shkollën “Ahmet Gashi”, u shpreh se ka ndodhur që mos t’i pranohet kjo monedhë për pagesë.
“Ka dyshu konduktori edhe për shkak që këtë kohën e fundit po thonë që 2 eurot janë shumë false, edhe po i ka kthy ka ndodhë, për shkak se udhëtoj çdo ditë”, ka thënë ajo.
Të njëjtën e ka theksuar edhe një i ri tjetër, Arian Aliu, që shfrytëzon linjën 3A.
“Ka ndodhur që konduktori me i kthy 2 euro se ka dyshu që janë të falsifikuara”, ka theksuar Arian Aliu.
Disa nga konduktorët, që folën në kushte anonimiteti, pranuan se ka pasur raste që nuk i kanë pranuan këto monedha dhe thanë se madje i kanë kërkuar ndërmarrjes për ndalimin e qarkullimit të tyre, por këtë e mohon drejtori operativ i “Trafikut Urban”, Mentor Isufi.
Sipas Isufit, është hera e parë që dëgjon se punëtorët e “Trafikut” nuk pranojnë monedha 2-euroshe.
“Në ligj nuk lejohet, është shteti, Qeveria, Kuvendi, i cili i bën ligjet i heq dhe i zbaton, nuk janë konduktorët me kërku dhe askush tjetër nuk mundet, sepse Ligji nuk e ndalon, nuk na e mundëson me ja ndalu mos me marrë një monedhë që është zyrtare në një shtet”, ka theksuar Isufi.
Falsifikimi i parasë është vepër penale dhe sanksionohet sipas nenit 302 të Kodit Penal të Republikës së Kosovës. KOHA ka raportuar edhe më parë për paratë e falsifikuara, ku nga Agjencia e Kosovës për Forenzikë është bërë e ditur se monedha dyeuroshe dhe kartëmonedha 100-euroshe janë më të falsifikuarat e që janë në qarkullim në Kosovë.
