Liderët e gjashtë vendeve të Ballkanit Perëndimor (BP6) kanë dalë me deklaratë të përbashkët pas Samitit të Liderëve të Ballkanit Perëndimor dhe Bashkimit Evropian për Planin e Rritjes së BE-së me sloganin “Një rajon, vizion i përbashkët”.
Në këtë deklaratë të përbashkët janë renditur 16 pika për të cilat janë marrë vesh liderët e BP6-s, të cilët janë pajtuar për ta çuar më tej bashkëpunimin në rjon dhe për të punuar drejt politikës së zgjerimit të BE-së.
Në këtë deklaratë thuhet se është përshëndetur miratimi nga Parlamenti Evropian dhe Këshilli i BE-së për Reformë dhe Rritje, e cila do të stimulojë më tej rrugën e anëtarësimit në BE të Ballkanit Perëndimor, duke ofruar ndihmë financiare shtesë për zbatimin e reformave themelore.
Palët janë pajtuar që ta synojnë lehtësimin e transformimit ekonomik, duke i hapur rrugën anëtarësimit të plotë në BE.
“Me perspektivën e Planit të Ri të Rritjes për Ballkanin Perëndimor 6, jemi të përkushtuar të përqafojmë mundësitë e paraqitura nga kjo nismë për rajonin; synimi ynë është të lehtësojmë transformimin ekonomik dhe social të shoqërive tona, duke i hapur rrugën anëtarësimit të plotë në Bashkimin Evropian, duke qëndruar të përkushtuar ndaj respektimit të parimit të aderimit të bazuar në merita gjatë gjithë këtij procesi”, thuhet në këtë deklaratë.
Më tej udhëheqësit e vendeve të Ballkanit Perëndimor janë pajtuar që do të mbeten tëq përkushtuar për përfundimin e përsëritjes së parë të Planit të Veprimit CRM që përfundon në vitin 2024 dhe bëjnë thirrje për zbatimin e plotë të marrëveshjeve të kaluara të arritura në kontekstin e tij.
“Angazhohemi të miratojmë Planin e ri të Veprimit për Tregun e Përbashkët Rajonal 2025-2028 në Samitin e Liderëve të Procesit të Berlinit 2024. Kjo fazë e re e CRM-së vepron si një hap drejt Tregut të Vetëm të BE-së në shumë sektorë, duke zhbllokuar potencialin ekonomik të rajoni, duke krijuar mundësi për sektorin tonë privat dhe (SME-të) si dhe për punëtorët”, thuhet në pikën e pestë të deklaratës.
Në deklaratën e përbashkët është përmendur edhe përmirësimi në bashkëpunimin doganor ndërmjet BP-së dhe BE-së.
“Duke njohur nevojën për përmirësimin e lëvizjes së lirë të mallrave, BB6, Sekretariati i CEFTA-s dhe Komuniteti i Transportit do të finalizojnë dhe zbatojnë udhërrëfyesin e Korsive të Gjelbërta, duke përfshirë përmes rritjes së tregtisë ndërrajonale brenda Ballkanit Perëndimor, përmirësimin e bashkëpunimit doganor ndërmjet Ballkanit Perëndimor dhe BE-ja dhe modernizimi i pikave të kalimit kufitar/të përbashkët (PKK)”, thuhet në njoftim.
Tutje është përmendur edhe zgjidhja e mosmarrëveshjeve tregtare.
“Duke marrë parasysh rëndësinë e një mekanizmi efikas për zgjidhjen e mosmarrëveshjeve tregtare, ne njohim rëndësinë e përfundimit të negociatave të Protokollit Shtesë 7 të CEFTA-s për Zgjidhjen e Mosmarrëveshjeve me qëllim të prezantimit të marrëveshjes në Samitin e ardhshëm të Procesit të Berlinit. Për këtë qëllim CEFTA do të sigurojë trajtim të barabartë të të gjitha palëve”, thuhet në deklaratë.
Siç bëhet e ditur, vendet e BP-së kanë shprehur gatishmërinë për të intensifikuar përpjekjet për të ndjekur angazhimet e kaluara në kuadër të Procesit të Berlinit, duke përfshirë zbatimin e plotë të Marrëveshjeve për lëvizshmërinë.
“Individualisht, duhet të trajtojmë dhe eliminojmë me zell pengesat ndaj interesave të përbashkëta që dalin nga kjo agjendë, të cilën ne e pranojmë si përfundimisht të dobishme për qytetarët tanë, prosperitetin ekonomik dhe integrimin evropian të rajonit tonë. Për këtë qëllim, angazhohemi të sigurojmë institucione rajonale plotësisht funksionale për të çuar përpara Tregun tonë të Përbashkët Rajonal dhe për t'u përgatitur për integrimin tonë më të ngushtë në tregun e vetëm të BE-së”, thuhet tutje në deklaratë.
Më tej është përmendur pjesëmarrja e rajonit në institucionin e ri të BE-së për luftimin e krimit financiar.
“Të udhëhequr nga dëshira për të forcuar sigurinë rajonale, për të rritur integritetin financiar dhe për të forcuar bashkëpunimin në luftimin e krimit financiar, liderët e Ballkanit Perëndimor 6 shprehin interesin e tyre për të eksploruar mundësitë për të bashkëpunuar me Autoritetin e ri Kundër Pastrimit të Parave të Bashkimit Evropian (AMLA)”, theksohet në deklaratë.
