Drejtori i Qendrës për Studime të Evropës Juglindore, Florian Bieber, ka thënë se Kosova është shpërblyer pak nga Bashkimi Evropian për demokracinë e fuqishme që e ka zhvilluar. Në diskutimin në podcastin PIKË me publicistin Veton Surroi, Bieber u shpreh se në rajon, Kosova ka treguar më së shumti gatishmëri për ta forcuar demokracinë.
Surroi e ngriti një pyetje të rëndësishme duke e konsideruar situatën e Kosovës si të vështirë për të avancuar më tej në forcimin e demokracisë zgjedhore dhe përpjekjen për të ndërtuar një demokraci funksionale, ndërsa konsiderohet si “lëkundëse e varkës”.
Bieber, nga ana e tij, e pranoi se është paradoksale që në dekadën e fundit shumë vende të rajonit janë bërë më pak demokratike, ndërsa Kosova ka treguar zhvillim pozitiv në këtë drejtim. Ai theksoi se ndryshimet e qeverisë dhe funksionimi i zgjedhjeve janë dëshmi e një demokracie të fuqishme, por shtoi se Kosova ka fituar pak shpërblime nga ky avancim. Sipas tij, autokratët, siç është presidenti serb Aleksandar Vuçiq, përdorin këtë si mundësi për të kritikuar dhe shfrytëzuar mangësitë e demokracisë në rajon, duke e paraqitur Kosovën si "budalla" që bën kompromise dhe nuk merr asgjë në këmbim.
Bieber e konsideroi si një gabim të madh të Bashkimit Evropian investimin në autokratë dhe theksoi se shpërblimi i atyre që kërcënojnë rendin ndërkombëtar dhe i injorimi i miqve të besuar, siç është rasti i Kosovës, është një politikë e gabuar. Ai e mbylli diskutimin duke theksuar se në fund të fundit, kjo sjell një pasiguri të madhe dhe jo një përfitim të vërtetë për vendet që angazhohen për stabilitet dhe demokraci.
