-
Nga:
Sefer Zogaj
- 30 janar 2022 20:12
- Shpërndaje në:
Në kohën kur Kosova ka përjetuar inflacionin më të madh, Autoriteti i Konkurrencës ka mbetur pa komisionin përgjegjës për hetimin dhe gjobitjen e bizneseve që kurdisin çmimet. Për pasojë, që nga 9 qershori i vitit të shkuar nuk ka mundur të hapej asnjë hetim për ngritjen e çmimeve. Në Qeveri nuk premtojnë se situata mund të ndërrojë shpejt
Prishtinë, 30 janar - Në valën e rritjes më të madhe të çmimeve në treg, Autoriteti Kosovar i Konkurrencës ka mbetur pa komisionin përgjegjës për hetimin dhe gjobitjen e bizneseve që kurdisin çmimet.
Për pasojë, që nga 9 qershori i vitit të kaluar nuk ka mundur të hapej asnjë hetim për ngritjen e çmimeve në Kosovë, që i bien gati tetë muaj.
Sakip Imeri, drejtor i përgjithshëm i AKK-së, e ka vlerësuar të pafavorshme për konsumatorët situatën.
“Mungesa e komisionit krijon një hendikep në fillimin dhe mbylljen e hetimeve ekzistuese, dhe interesi i Kosovës është që të mos krijohet zbrazësi më e madhe”, deklaroi Sakip Imeri, drejtor i përgjithshëm i AKK-së.
Qysh në fillim të vitit të shkuar, Kuvendi dhe Qeveria ishin paralajmëruar se AKK-ja do të mbetej pa Komision, por nuk kanë ndërmarrë asgjë në këtë drejtim.
“I kam njoftuar më 23 mars që këtij komisioni i skadon mandati më 9 qershor”, shtoi Imeri.
Institucionet janë justifikuar për mungesën e marrjes së veprimeve.
“Deri më tani në Kuvend nuk janë proceduar emrat e kandidatëve potencialë për të qenë pjesë e AKK-së”, thuhet në përgjigjen e Kuvendit të Kosovës.
E në Qeveri nuk dhanë zotim që propozimet për anëtarët e Komisionit do t’i përcjellin shpejt.
“Komisioni i AKK-së do të funksionalizohet. Emrat e kandidatëve potencialë do të dërgohen në Kuvend, pas miratimit dhe hyrjes në fuqi të projektligjit për Mbrojtjen e Konkurrencës, meqë në atë projektligj parashihen fushat dhe format e bashkëpunimit dhe koordinimit ndërmjet MINT dhe AKK-së me qëllim mbrojtjen e konkurrencës së shëndoshë të tregut”, u shpreh Përparim Kryeziu, zëdhënës i Qeverisë.
Raporti i fundit përmbledhës që ka publikuar Agjencia e Statistikave në lidhje me inflacionin është ai për tremujorin e dytë të vitit të kaluar.
Bazuar në të, çmimet e produkteve të konsumit janë rritur për 5.7 për qind.
Vlerësohet se çmimet e produkteve janë rritur sidomos në fund të vitit të shkuar.
