QUINT: Qëndrimi ynë për hapjen e Urës së Ibrit nuk ka ndryshuar

Qëndrimi i vendeve të QUINT-it sa i përket hapjes së Urës së Ibërit nuk ka ndyshuar.

Në një përgjigje për KOHËN të ambasadës së Gjermanisë në Prishtinë thuhet se ky qëndrim është komunikuar vazhdimisht dhe se me të janë të njohur të gjithë akterët. 

“Qëndrimi i ambasadave të vendeve të QUINT-it është komunikuar vazhdimisht dhe është i njohur për të gjithë akterët. Nuk ka asnjë ndryshim në këtë pozicion”, ka thënë kreu për Kulturë, Media dhe Komunikim në Ambasadën e Gjermanisë, Christian Boettcher.

Përfaqësues të shteteve të QUINT-it në vazhdimësi kanë deklaruar se janë kundër ndryshimit të statusit të Urës së Ibrit. Sipas tyre kjo çështje duhet të zgjidhet në kuadër të dialogut me Serbinë. 

Të martën e kësaj jave, në një vizitë në veri të vendit Kurti kishte thënë se për hapjen e urës janë në pritje të koordinimeve të vendeve të QUINT-it me KFOR-in.

“Ne jemi gati. Me konsultime e koordinim. Po i presim QUINT-in dhe KFOR-in. Vazhdimisht jemi në koordinim me ta. Kemi bërë përgatitje dhe punë sa i përket edhe pastrimit të mjedisit rrotull aty edhe të vlerësimit të qëndrueshmërisë së Urës në aspektin teknik dhe fizik”, pati thënë Kurti. 

Pak orë pas deklaratës së Kurtit për hapjen e Urës, misioni i NATO-s në Kosovë, KFOR, ka përcjellë për mediat një deklaratë. Në të thuhet se qëndrimi i KFOR-it nuk ka ndryshuar. Theksohet se vendimi për hapjen e Urës qendrore në Mitrovicë duhet të merret në dialog.

“Për çështjen e hapjes së mundshme të Urës së lumit Ibër në Mitrovicë për automjete, qëndrimi ynë ka qenë transparent dhe konsistent gjatë gjithë kohës. Çdo vendim në këtë drejtim duhet të merret përmes dialogut dhe në koordinim në kohë dhe efektiv me komunitetin ndërkombëtar“, thuhet në deklaratën e zëdhënësit të KFOR-it, Salvatore Mascoli.