Ish-pjesëtari i Ushtrisë Çlirimtare të Kosovës (UÇK), Blerim Ramadani – i arrestuar muajin e kaluar nga policia maqedonase – ka ikur nga arresti shtëpiak nga shtëpia e të afërmve të tij në Maqedoninë e Veriut.
Ministria e Punëve të Brendshme e Maqedonisë së Veriut tha të enjten për agjencinë e lajmeve MIA se është duke marrë masa për gjetjen e vendndodhjes së Ramadanit.
Blerim Ramadani në bazë fletarrestit ndërkombëtar të lëshuar në Interpol nga Serbia u arrestua më 17 korrik në vendkalimin kufitar të Jazhincës. Përmbajtja e fletarrestit bazohet në dyshimet e Serbisë se Ramadani në cilësinë e ish-ushtarit të UÇK-së ka kryer krime lufte në rajonin e Nerodimes.
Ministri serb i Punëve të Brendshme, Ivica Daçiq, gjatë vizitës në pikën kufitare të Tabanocit më 25 korrik kërkoi nga autoritet e Shkupit ta ekstradonin Ramadanin në Serbi. Çështja e ekstradimit të Ramadanit u hap edhe gjatë vizitës së ministrit të Brendshëm të Kosovës, Xhelal Sveçla, në Shkup. Ai ka thënë se Shkupi duhet të vendosë në mënyrë të pavarur, duke akuzuar Serbinë për tendencë në prishjen e raporteve mes shteteve të Ballkanit Perëndimor.
Ramadani do të qëndronte në “arrest shtëpie” deri më 16 gusht. Pas kësaj gjykata duhet të vendosë nëse ndaj Ramadanit duhet të nisë procedura e ekstradimit apo të lihet i lirë.
Ramadani është shtetasi i tretë i Kosovës si ish-ushtar i UÇK-së, i arrestuar në Maqedoninë e Veriut mbi bazën e fletarresteve serbe. Ishin arrestuar Gafurr Dugolli dhe Tomorr Morina, por me vendim të gjykatës ishin lënë të lirë.
Në Shkup pati protesta që kërkuan lirimin e Ramadanit.
Blerim Ramadanit i ishte ndërruar sërish masa, nga arresti shtëpiak në kthim në paraburgim
Ish-ushtarit të Ushtrisë Çlirimtare të Kosovës, Blerim Ramadani, i ishte ndërruar sërish masa në Maqedoninë e Veriut nga arresti shtëpiak për kthim në paraburgim.
Kjo është njoftuar nga Ministria e Jashtme dhe e Diasporës e Kosovës, raporton “KosovaPress”.
Në mediumet në shtetin fqinj të enjten është njoftuar se Ramadani është arratisur nga arresti shtëpiak në Maqedoni të Veriut.
Ramadani kishte qenë në pritje të vendimit të Gjykatës Supreme.
“Ju njoftojmë se Ambasada e Republikës së Kosovës në Maqedoni të Veriut është njoftuar nga avokati i Ramadanit se është ndërruar masa e sigurisë nga arresti shtëpiak në kthim në paraburgim, në kohën kur i njëjti ishte në pritje të vendimit të Gjykatës Supreme”, ka thënë Leutrim Sahiti, këshilltar politik në MPJD.
Sahiti ka thënë se informacione tjera zyrtare nuk kanë pranuar nga autoritetet relevante të Maqedonisë së Veriut.
Gjykata Themelore Penale në Shkup me datë 8 gusht 2024 mori vendim për mosekstradimin e Blerim Ramadani në Serbi.
