Dëshmitari thotë se i akuzuari për krime lufte në Istog ia ka rrahur vëllain

Në Gjykatën Themelore në Prishtinë ka dëshmuar Naim Curraj në çështjen penale për krime të kryera gjatë luftës, ku akuzohet Çaslav Joliq për maltretim të personave civilë, përfshirë edhe vëllain e dëshmitarit, të cilit ai tha se ia kanë thyer nofullën.

Në gjykimin për krime lufte ndaj Çaslav Joliqit, dëshmitari Naim Curraj ka thënë se i akuzuari me dy persona të tjerë e kanë rrahur vëllain e tij.

Dëshmitari është vëllai i Nexhmedin Currajt, njëri nga viktimat e pretenduara të Joliqit dhe disa policëve të tjerë serbë.

Naimi Curraj u shpreh të enjten, në seancën e radhës për këtë rast në Gjykatën Themelore në Prishtinë, se kur e ka parë vëllain e tij, ai ishte në gjendje tepër të rëndë.

“Nexhemedini ka qenë në gjendje të mjerueshme, nofullën e ka pasur të thyer dhe dhëmbët”, ka thënë dëshmitari Curraj.

Ai u shpreh se nuk e ka parë ngjarjen kur i është maltretuar vëllai, porse i kanë treguar të tjerët. Sipas tij, atë e kanë rrahur tre serbë.

“Nexhmedinin e kanë rrahë Çasllavi, Llaza dhe Rad Petoliqi”, ka thënë ai.

Prokurori Ilir Morina e pyeti se kush i ka treguar se Çasallavi e ka rrahur vëllain e tij dhe ai foli me emra e mbiemra.

“Naim Ferati edhe Zef Malsiaj”, ka thënë ai.

Dëshmitari u ballafaqua nga trupi gjykues nëse mund të identifikonte të akuzuarin Joliq dhe personin e quajtur Zoran, por tha se nuk mundet.

I akuzuari Joliq është deklaruar i pafajshëm në seancën e 14 dhjetorit 2022.

Prokuroria Speciale në nëntor të vitit të kaluar ngriti aktakuzë ndaj Joliqit me pretendimet se gjatë kohës së luftës në territorin e Komunës së Istogut në bashkëkryerje me persona të tjerë, duke i shkelur rregullat e së drejtës ndërkombëtare, ka aplikuar masat e torturimit dhe shkaktimit të vuajtjeve të mëdha apo cenimit të integritetit trupor ose shëndetit kundër popullsisë civile.