OSBE-ja me propozim nëntë-pikësh për dalje nga kriza në veri

Kryesuesi i Organizatës për Siguri dhe Bashkëpunim në Evropë (OSBE), Bujar Osmani, ka publikuar një udhëzues për dalje nga kriza në veri të Kosovës.

Udhëzuesi përmban nëntë pika, për të arritur, siç ka thënë Osmani, shtensionimin dhe normalizimin, paqen e qëndrueshme dhe stabilitetin në Kosovë.

Pikë e parë e këtij udhëzuesi është që Kosova dhe Serbia të rikonfirmojnë zotimet për zbatim të marrëveshjeve të Brukselit e të aneksit të Ohrit. Në pikë të dytë në udhëzues është propozuar që Kosova të tërheqë njësitet speciale të Policisë, e Serbia të heqë alarmin për gatishmëri luftarake. Në pikë të tretë është propozuar që Policia, me ndihmën nga KFOR-i e EULEX-i të menaxhojnë sigurinë në terren.

Anulimi i protestave, rikthimi i funksionalizimit dhe shërbimeve komunale, vazhdimi i jetës normale dhe garantimi i qasjes për punonjësit komunalë, janë përmendur në pikën e katërt të propozimit.

Në pikë të pestë është thënë që kryetarët e zgjedhur të komunave në veri duhet të dorëhiqen gjatë verës për t’i hapur rrugë zgjedhjeve të reja.

Zgjedhjet e parakohshme është propozuar të mbahen sivjet.

OSBE-ja ka thënë se përkrah procesin zgjedhor dhe rritjen e mirëbesimit në mes të komuniteteve, që të angazhohen të rinjtë në programet dhe proceset e pajtimit dhe që të zbatohen me mirëbesim dispozitat e dakorduara dhe rifillimin e dialogut kuptimplotë, si pikat 7, 8 dhe 9.