Kryeministri i Kosovës, Albin Kurti, i ka kërkuar Parlamentit Evropian mbështetje gjatë gjithë rrugës integruese në Bashkimin Evropian, ndërsa ka theksuar rëndësinë e mbështetjes të PE-së në trajtimin sa më të shpejtë të aplikimeve të Kosovës në organizatat evropiane.
Këto komente, sipas njoftimit të Kryeministrisë të mërkurën, Kurti i bëri në një takim me eurodeputetë të grupit të Partisë Popullore Evropiane (EPP) në Parlamentin Evropian, Lukas Mandl nga Austria, Michael Gahler, Rainer Wieland dhe Niklas Herbst nga Gjermania, Karlo Ressler nga Kroacia, Franc Bogovic nga Sllovenia, Vladimir Bilcik nga Sllovakia.
Ata u takuan në Strasburg të Francës. EPP-ja përbën grupin më të madh politik në Parlamentin Evropian.
“Në takim gjithashtu u diskutua edhe për aplikimin e Kosovës në Bashkimin Evropian, në dhjetor të vitit të kaluar, dhe për aplikimin në Këshillin e Evropës, në maj të vitit të kaluar, dy organizata këto me të cilat shteti dhe populli i Kosovës ndajnë synime, vlera dhe bindje të përbashkëta. Kryeministri Kurti theksoi rëndësinë e përkrahjes së Parlamentit Evropian në trajtimin sa më të shpejtë të aplikimeve të Kosovës dhe mbështetjes përgjatë gjithë rrugëtimit integrues. U folë edhe për takimin e 18 marsit në Ohër, mundësitë që paraqet dhe pritjet nga ai takim”, thuhet në njoftim.
Kurti, i shoqëruar nga ambasadori i Kosovës në Bruksel, Agron Bajrami, i njoftoi deputetët evropianë “për zhvillimet e fundit në vend, arritjet kryesore të qeverisë, e cila javën tjetër mbushë plot dy vjet, sukseset në sundimin e ligjit dhe luftimin e korrupsionit, dhe për përmirësimet në indikatorët demokratikë dhe ekonomikë, të evidentuara edhe në raportet ndërkombëtare”.
“Së fundmi, sipas Fondit Monetar Ndërkombëtar, Kosova është renditur e para në Ballkanin Perëndimor me rritjen më të madhe të të hyrave tatimore mes vitin 2020-2022, dëshmi e formalizimit të ekonomisë, mbledhjes së borxheve dhe e gatishmërisë së qytetarëve dhe bizneseve që të paguajnë tatime. Teksa është ngritur për 20 vende në dy vitet e fundit në indeksin e perceptimit të korrupsionit sipas Transparency International”, thuhet në njoftimin e Kryeministrisë.
Eurodeputetët, siç thotë njoftimi, dhanë vlerësimin e tyre pozitiv dhe shprehen mbështetjen e plotë ndaj reformave të qeverisë, përparimit demokratik, sundimit të ligjit dhe luftës kundër korrupsionit.
Kurti po qëndron në Strasburg për të marrë pjesë në takimin e 10-të të Komitetit Parlamentar për marrëveshjen e Stabilizim-Asocimit me BE-në. Ai do të qëndrojë në Francë për dy ditë.
Kurti në Strasburg është takuar edhe me eurodeputetin spanjoll Juan Fernandeso Lopez Aguilar, që është kryetar i Komitetit LIBE.
“Eurodeputeti Aguilar shprehu mbështetjen e tij për aplikimin e Kosovës në Këshillin e Evropës dhe Bashkimin Evropian, si dhe për konkludimin e procesit të liberalizimit të vizave nga Parlamenti Evropian, ashtu që qytetarët e Kosovës të mund të udhëtojnë lirshëm e pa viza në zonën Shengen nga 1 janari i vitit të ardhshëm”, thuhet nga Zyra e Kryeministrit.
Kurti ka takuar edhe Presidenten e Parlamentit Evropian, Roberta Metsola, me të cilën ndër tjerash ka diskutuar për aplikimin e Kosovës për anëtarësim në BE, liberalizimin e vizave, propozimin Evropian dhe takimin që do ta mbahet në Ohën të shtunën.
Kurti gjatë qëndrimit në Strasburg është takuar edhe me kryetarin e Komisionit për Punë të Jashtme në Parlamentin Evropian, eurodeputetin David McAllister.
“Kryeministri Kurti dhe eurodeputeti McAllister diskutuan edhe për procesin e dialogut të lehtësuar nga BE, për propozimin Evropian për normalizim të marrëdhënieve ndërmjet Kosovës dhe Serbisë, të dakorduar në Bruksel me 27 shkurt, dhe për takimin që pritet të mbahet këtë fundjavë në Ohër të Maqedonisë së Veriut. Sa i përket planit të zbatimit të Marrëveshje Bazë sipas propozimin Evropian, kryeministri tha se ai duhet të përmbajë detaje konkrete dhe të jetë gjithëpërfshirës, të ofrojë efektivitet në zbatim dhe të jetë i sekuencuar në mënyrë të balancuar”, thuhet nga Zyra e Kryeministrit.
