Kryeministri i Shqipërisë Edi Rama, ai i Maqedonisë së Veriut, Zoran Zaev dhe Presidenti i Serbisë, Aleksandër Vuçiq, kanë zhvilluar këtë të martë një takim online në kuadër të Shengenit Ballkanik ku u diskutuan hapat e mëtejshëm në bashkëpunimin rajonal.
Të tre udhëheqësit diskutuan për zgjerimin e mëtejshëm të bashkëpunimit, me synimin për të hequr pengesat në lëvizjen e njerëzve, kapitalit, mallrave dhe shërbimeve midis tre vendeve e në rajon dhe kjo të fillohet të zbatohen sa më shpejt të jetë e mundur në të gjithë rajonin, raporton tch.
Ata ranë dakord që vendet e Ballkanit Perëndimor kanë nevojë për anëtarësim në Bashkimin Evropian, por gjithashtu që Bashkimi Evropian ka nevojë për Ballkanin Perëndimor po aq, pasi rajoni është i rrethuar nga kufijtë e BE-së dhe vendet që aspirojnë anëtarësimin ndajnë vlerat e përbashkëta evropiane bashkëpunimi.
Bashkëbiseduesit theksuan se pavarësisht vonesave në procesin e zgjerimit, ata do të vazhdojnë të përpiqen të njohin mënyra të reja, fusha të politikave dhe instrumente financiarë, në mënyrë që të tre vendet të rrisin kontributin e tyre në Evropë, të forcojnë lidhjet me Bashkimin Evropian dhe të integrohen gradualisht rajoni në tregun e vetëm evropian.
Duke folur për Agjendën e Gjelbër, bashkëbiseduesit lëshuan një thirrje të përbashkët për Bashkimin Evropian dhe Shtetet e Bashkuara për t’u bashkuar me vendet në të gjithë rajonin për të mbështetur zhvillimin e projekteve që mund të investohen sa më shpejt të jetë e mundur, për të përmirësuar mbrojtjen e mjedisit dhe për të rritur përdorimin e gjerë të burimeve të rinovueshme, si pjesë e zbatimit të Planit Ekonomik dhe të Investimeve të BE dhe Agjendës së Gjelbër për Ballkanin Perëndimor.
“Vendet tona kanë një potencial të madh për rritje të qëndrueshme dhe zhvillim të këtij sektori. Ne do të kërkojmë mbështetje praktike për të zbuluar se cilat projekte mund të përmirësojnë rajonin tonë në drejtim të burimeve të ripërtëritshme të energjisë për qytetarët tanë dhe për të ardhmen e energjisë së gjelbër të BE”, u tha në konferencë.
Ata arritën në përfundimin se vetëm integrimi rajonal, me mbështetjen e Bashkimit Evropian, mund të kontribuojë në stabilitetin dhe përparimin e përgjithshëm të të gjithë rajonit dhe Evropës.
Në nëntor të vitit 2020, Vuçiq dhe Rama nënshkruan një marrëveshje që ua mundësoi qytetarëve të Serbisë dhe Shqipërisë të hynin në territorin e dy vendeve me një kartë identiteti.
Gjatë të njëjtit takim, udhëheqësit e Shqipërisë, Maqedonisë së Veriut dhe Serbisë nënshkruan një memorandum për bashkëpunimin në luftën kundër pandemisë.
Sipas memorandumit, të tre vendet do të ndanin informacion mbi pandeminë dhe për të udhëtuar në këto shtete nuk do të kërkohej tampon.
