“22 votat i keni për presidentin”, Deliu i bën thirrje LVV-së për ndryshimet në Ligjin për Specialen

Deputetja e Partisë Demokratike të Kosovës, Blerta Deliu, ka kërkuar nga Kuvendi i Kosovës që të miratojë ndryshimet në Ligjin për Dhomat e Specializuara. Një ditë pasi Qeveria e ka dërguar në Kuvend projektligjin e sponsorizuar nga PDK-ja, deputetja e kësaj partie e konsideron të domosdoshme miratimin e tij, duke thënë se, në këmbim, PDK-ja do t’i vërë në dispozicion 22 votat për zgjedhjen e presidentit të Kosovës.

Deliu ka thënë se miratimi i plotësim-ndryshimit të këtij ligji në dy lexime do t’i hapte rrugë një marrëveshjeje politike për presidentin, duke theksuar se vendi ka nevojë për stabilitet dhe një figurë që përafron forcat politike.

“Në rast se do të miratohet ligji brenda dy leximeve, plotësim-ndryshimi i ligjit për Dhomat e Specializuara në Kuvend, Partia Demokratike e Kosovës do t’i ketë 22 votat në dispozicion për zgjedhjen e presidentit. Ne besojmë që në situata të tilla të nevojës qytetare duhet të gjendet një emër që i kontribuon stabilitetit. Edhe thirrjet e fundit të përfaqësuesve të Komisionit Evropian ishin për stabilitet. Kosova ka nevojë më shumë se kurrë që të ketë stabilitet politik. Por, për të garantuar këtë stabilitet, duhet një reflektim i partisë që ka fituar numrin më të madh të mandateve”, tha ajo.

E pyetur se cili mund të jetë kandidati që do të bashkonte LVV-në dhe PDK-në, ajo nuk ka përmendur ndonjë emër konkret, por ka thënë se presidenti duhet të jetë një figurë që afron forcat politike dhe shmang zgjedhjet e reja parlamentare.

“Unë nuk mund të flas se nga kush mund të vijë, por unë mendoj që të gjithë duhet të jemi të përgjegjshëm për situatën, momentumin politik dhe duhet të jetë dikush që përafron forcat politike, që vendi të mos rrëshqasë drejt zgjedhjeve të reja parlamentare. Nuk mund të flas sot, sepse ende s’kemi arritur te çështja e presidentit. Dua të besoj në vullnetin e përbashkimit, nëse ai ekziston. Jo të përbashkimit në parime, por në vullnetin e asaj që ka karakterizuar sot Kosovën”, tha ajo.

Edhe Arbëri 8 o. më parë PDK e Aleanca kërkojnë seancë sot për votimin e ndryshimeve të Ligjit për Specialen

Deliu ka theksuar se PDK-ja nuk dëshiron zgjedhje të reja, por nuk do të mbështesë vendime që, sipas saj, do të bëheshin zgjatim i pushtetit të LVV-së.

“Nëse s’ka dakordim, ne nuk ikim zgjedhjeve, zgjedhjet nuk i kontribuojnë stabilitetit, por megjithatë, nëse s’ka dakordim, ne nuk mundemi të bëhemi patericë e vendimeve të askujt dhe nuk mund të bëhemi zgjatim i një pushteti, i rritjes së pushtetit që sot nuk do të duhej të ishte momentum që na përbashkon. Nëse partitë që kanë fituar numrin më të madh të ulëseve reflektojnë, janë të vetëdijshëm, siç po deklarohen që janë të shqetësuar me zhvillimet në Hagë, nëse këtë e dëshmojnë në hapa konkretë dhe nuk provojnë që të krijojnë normalitet sikur këto janë temat e politikave tona ditore, atëherë natyrisht që ne nuk kemi rrugë tjetër”, deklaroi ajo.

Duke folur për mundësinë e zgjedhjeve të reja në nëntor, nëse nuk ka zgjidhje për presidentin, Deliu ka thënë se aktgjykimi i 16 shtatorit ndaj ish-krerëve të UÇK-së do të jetë pjesë e pashmangshme e fushatës zgjedhore.

Ajo ka përmendur edhe problemet ekonomike dhe sociale me të cilat përballet vendi, përfshirë inflacionin, shëndetësinë, arsimin dhe marrëdhëniet me partnerët ndërkombëtarë, por ka thënë se, përtej këtyre çështjeve, Kosova po përballet edhe me atë që e ka cilësuar si rrezikim të historisë së luftës.

“Nëse do të ketë zgjedhje, prapë edhe proceset tona zgjedhore nuk mund të shmangen nga aktgjykimi i datës 16. Kushdo që mendon që mund të garojë me programe, unë e kuptoj që qytetarët e Kosovës sot kanë edhe nevoja të tjera dhe ju hyjmë në hak nëse s’flasim edhe për to. Jeta është… inflacioni është tepër i lartë, jeta e secilit qytetar sot është më e rënduar se asnjëherë më parë, shëndetësia është në kolaps, arsimi, kemi parë testet e fundit të PISA-s, raportet tona me partnerët janë më të cenuara se asnjëherë më parë, mirëqenia është e cenuar. Por, karshi të gjitha këtyre problemeve që i ka Kosova, sot po na rrezikohet edhe historia jonë, që ne të cilësohemi si ndërmarrje e përbashkët kriminale”, theksoi ajo.

Deliu është pyetur edhe nëse është penduar për votën pro themelimit të Gjykatës Speciale. Ajo ka thënë se në kohën kur është votuar themelimi i saj, konteksti politik ka qenë ndryshe, ndërsa ka theksuar se vota e saj ka qenë në përputhje me qëndrimin e atëhershëm të Hashim Thaçit, Kadri Veselit dhe krerëve të tjerë të PDK-së.

Edhe Arbëri 9 o. më parë Katër ditë afat për presidentin, Ligji për Specialen në duar të deputetëve

“Ka qenë komplet dhe tërësisht një kontekst tjetër politik. E thashë, raporti i Dick Martyt, akuza mbi të cilën janë akuzuar Ushtria Çlirimtare e Kosovës, akuza e padrejtë e sponsorizuar nga qarqet ruse e serbe. Pra, ne jemi ballafaquar asokohe me një akuzë se kemi trafikuar organe. Është përmendur Shtëpia e Verdhë, janë përmendur argumente të paqena që Ushtria Çlirimtare e Kosovës ka bërë krime kundër njerëzimit. Fatmirësisht, të gjitha këto pretendime të rrejshme kanë rënë. As në këtë akuzë, po as në vendimin e dënimit të tyre, askund nuk përmendet trafikimi i organeve, Shtëpia e Verdhë dhe nuk përmenden edhe krimet kundër njerëzimit. Hashim Thaçi, Kadri Veseli, asokohe e kanë pasur edhe Jakup Krasniqi e Rexhep Selimi, kanë qenë të veshur edhe me pushtet qytetar, ata kanë qenë të vetëdijshëm për koston e rëndë që do ta paguajnë individualisht, por kanë besuar në partneritetin dhe, mbi të gjitha, kanë besuar që Ushtria Çlirimtare e Kosovës ka bërë luftë të drejtë. Për diçka që ka votuar Hashim Thaçi asokohe, natyrisht që unë rreshtohem përherë me çlirimtarët. Dhe vota ime ka qenë votë me Hashim Thaçin, me Kadri Veselin, me krerët e PDK-së”, deklaroi ajo.

Ajo ka paralajmëruar përshkallëzim të protestave të qytetarëve nëse nuk miratohet projektligji për ndryshimin e ligjit për Dhomat e Specializuara.