Zbulohet xhirimi tetëminutash i zbarkimit të anglezëve në Sarandë
Artikujt tjerė
- Filarmonia e Kosovës bashkon solistët e veprat shqipe në koncert
- Drenas: Promovohet libri i Jakup Krasniqit “Pavarësi dhe personalitete”
- “The New York Times” për skenën e artit bashkëkohor në Kosovë
- Pamuk: Isha idioti i familjes, por më pas fitova Nobel-in
- Inva Mula: Shqiptarët në botë i përfaqëson kultura e tyre
- Zbulohet xhirimi tetëminutash i zbarkimit të anglezëve në Sarandë
- Kalendari historik, 2 mars
- Protestuesit ndalojnë prishjen e pjesës artistike të Murit të Berlinit
- “Udhëtimi i dytë” i piktores nga Kosova në Tiranë
- Rrezeart Galica hap ekspozitë personale në Gjenevë
Një xhirim i rrallë nga koha e Luftës së Dytë Botërore i është dorëzuar të premten Arkivit Qendror Shtetëror të Filmit nga Muzeu Historik Kombëtar të Shqipërisë. Ai është një film prej 8 minutash, i cili i është dhuruar MHK-së nga Bejtullah Destani, kërkues dhe studiues i marrëdhënieve kulturore shqiptaro-britanike. Filmi i xhiruar nga Peter Hopkinson, operator i njohur britanik gjatë kohës së Luftës, shpërfaq zbarkimin e komandove angleze në Spilje të Sarandës, gjatë Luftës së Dytë Botërore, dhe pikërisht më 29 korrik të vitit 1944. Është një filmim pa zë, bardhezi, që tregon ndihmën e aleatëve në Luftën Nacionalçlirimtare, raporton gazeta “Panorama”. Ashpërsia e luftës, zbarkimi i trupave ushtarake, ndërthuret me peizazhin shqiptar. Në bazë të Marrëveshjes së Bashkëpunimit mes Arkivit Qendror Shtetëror të Filmit dhe Muzeut Historik Kombëtar, ku thuhet se dy institucionet e mësipërme marrin përsipër të bashkëpunojnë në aktivitete të përbashkëta kulturore dhe në shkëmbimin e materialeve arkivale me vlerë historike, MHK ia ka dorëzuar AQSHF-së materialin filmik të dhuruar nga Bejtullah Destani, në formatin 35 mm. Nën titullin “Commando raid on Spilje”, tregohet se si në mëngjesin e 29 korrikut 1944, katër anije britanike i afrohen bregdetit të Spiljesë së Sarandës për të luftuar në operacionin e tyre të parë përgjatë Adriatikut. Qëllimi i këtij operacioni ishte përforcimi i luftës në Ballkan, përkrahja e rezistencës së partizanëve shqiptarë në këto zona.
Përpara se të rreshtohej në radhët e Ushtrisë, Peter Hopkinson shpresonte të bëhej një kineast i madh. Kishte bashkëpunuar në filmat “Citadela” dhe “Hajduti i Bagdadit”, deri sa në vitin 1939 i erdhi thirrja për të kryer shërbimin ushtarak. Por, fati i tij qe që edhe në Ushtri nuk do të ndahej nga profesioni i tij. Fillimisht do të dërgohej si kameraman e reporter në Lindjen e Mesme, pastaj në Rusi, e kështu me radhë, duke fiksuar momente të mëdha historike. Një ndër ta ishte edhe zbarkimi i komandove në gjirin e Sarandës, në verën e vitit 1944. Pas përfundimit të Luftës, u dërgua në Bjellorusi dhe Ukrainë për të filmuar gjendjen e fëmijëve jetimë. Edhe më tej ai u fokusua në tema të rëndësishme, ndaj edhe është nderuar edhe me çmime. Krijimtarinë e tij e vazhdoi deri në moshë të shtyrë. Dokumentari i fundit i përket vitit 2004. U nda nga jeta në vitin 2007, në moshën 87-vjeçare, shkruan sot Koha Ditore.
